Partia Socialiste ka depozituar sot pranë Komisionit për Shëndetësinë dhe Mirëqenien Sociale një set prej 22 amendamentesh për projektligjin “Për Barazinë Gjinore”, i cili është planifikuar të kalojë për votim në Kuvend më 30 tetor.
Sipas relacionit shoqërues, ndryshimet synojnë përmirësimin e formulimeve ligjore dhe “qartësimin e koncepteve që lidhen me barazinë mes burrave dhe grave”.
Amendamentet përfshijnë heqjen ose zëvendësimin e disa termave që lidhen me identitetin gjinor, orientimin seksual dhe përkatësinë e shumëfishtë, duke e kufizuar ligjin tek dy gjinitë tradicionale.
Lexo edhe:
Ndryshimet e propozuara nga grupi socialist prekin një pjesë të gjerë të neneve të draftit dhe synojnë, sipas relacionit shoqërues, përmirësimin e formulimeve ligjore dhe “qartësimin e koncepteve që lidhen me barazinë mes burrave dhe grave”.
Në propozimin e dorëzuar, ndryshimet fokusohen kryesisht në heqjen ose zëvendësimin e disa termave që lidhen me identitetin gjinor, orientimin seksual dhe përkatësinë e shumëfishtë, duke i zëvendësuar ato me formulime më të përgjithshme.
Konkretisht, në nenin 1 të projektligjit, pika 2 ndryshohet duke zëvendësuar fjalët “si dhe trajtim të barabartë pavarësisht përkatësisë gjinore” me “si dhe trajtim të barabartë mes grave dhe burrave”.
Në nenin 2, në shkronjën “a”, propozohet të hiqet shprehja “për shkak të përkatësisë së shumëfishtë”, ndërsa në nenin 4 janë kërkuar disa heqje, përfshirë fjalët “në të gjithë diversitetin e tyre”, “lidhur me identitetin dhe shprehjen gjinore” si dhe përkufizimin “orientim seksual”.
Në nenin 6, pika 1, PS kërkon të hiqen termat “orientimit seksual, identitetit gjinor, shprehjes së identitetit gjinor ose karakteristikave të seksit”.
Po ashtu, në nenin 7, pika 1, kërkohet heqja e shprehjes “apo pabarazive gjinore për shkak të përkatësisë së shumëfishtë”.
Në nenin 10, që ka të bëjë me politikat gjithëpërfshirëse, socialistët propozojnë që fjala “gjithëpërfshirëse” të hiqet nga titulli dhe përmbajtja, ndërsa termat “përkatësi e shumëfishtë” të zëvendësohen me “vulnerabiliteti”.
Në nenin 12, që lidhet me barazinë në vendimmarrje, fjalët “në të gjithë diversitetin e tyre” hiqen në disa pika, ndërsa në nenin 17, që trajton pjesëmarrjen e grave në jetën publike, propozohen heqje të ngjashme të fjalive që lidhen me “diversitetin” dhe “përkatësinë e shumëfishtë”.
Në nenin 18, pika 1, PS kërkon që fjala “e gjithëpërfshirës” të hiqet.
Në nenin 22, pika 1, shkronja “d”, dhe në pikën 2, termi “e gjithëpërfshirëse gjinore” hiqet.
Po ashtu, në titullin e Kreut IV, që lidhet me përfaqësimin gjinor në institucionet publike, propozohet që fjala “gjithëpërfshirëse” të fshihet. Në nenin 24, hiqet fjalia që parashikonte se “kuota gjinore synon të arrihet duke integruar kriteret e gjithëpërfshirjes dhe diversitetit gjinor në procedurat e konkurrimit dhe emërimit”.
Ndryshime të ngjashme bëhen edhe në nenin 25, ku hiqen termat “për shkak të përkatësisë së shumëfishtë” dhe “në të gjithë diversitetin e tyre”, si dhe fjalitë që lidhen me “përfaqësim gjithëpërfshirës”.
Në nenin 26, Kreun VI dhe një sërë nenesh të tjera nga 33 deri në 44, Partia Socialiste kërkon heqjen e çdo reference ndaj “përkatësisë së shumëfishtë”, “diversitetit gjinor”, “eliminimit të stereotipeve gjinore” apo “orientimit seksual”.
Në nenin 38, fjalitë “luftën kundër stereotipeve gjinore” dhe “eliminimin e stereotipeve gjinore” hiqen tërësisht, ndërsa në nenin 44 kërkohet që të fshihet çdo përmendje e “përkatësisë së shumëfishtë”.
Në total, amendamentet e paraqitura nga PS prekin pothuajse çdo nen të projektligjit, duke e zhvendosur theksin nga termat që lidhen me identitetin dhe orientimin gjinor, drejt një qasjeje më të kufizuar që e përkufizon barazinë gjinore kryesisht si barazi mes grave dhe burrave.
Projektligji me amendamentet përkatëse pritet të shqyrtohet në Komisionet parlamentare përpara se të kalojë në seancë plenare më 30 tetor, ku do të hidhet për votim.
