Një skandal i rëndë ka shpërthyer në klinikën dentare “Dental Turk” në zonën “Don Bosko” në Tiranë e cila akuzohet për krime kundër shëndetit të qytetarëve dhe evazion fiskal. Klinika ofronte shërbime dentare duke përdorur produkte të skaduara dhe pa asnjë dokumentacion ligjor, duke vënë në rrezik jetën e pacientëve dhe duke shmangur detyrimet tatimore.
Në qendër të skandalit është administratori i klinikës, 59-vjeçari Adnan Yizdizoglu i cili është arrestuar. Nën hetim janë vënë gjithashtu edhe tre punonjës të klinikës: koordinatorja B.K., 35 vjeçe, dhe dy laborantët L.S., 21 vjeçe dhe A.A., 42 vjeç. Gjatë kontrollit, janë sekuestruar 300 shishe me produkte të dyshuara, shumica të skaduara, me një vlerë totale rreth 100 mijë euro, si dhe mandate të pafiskalizuara.
Skandali ka ngritur pikëpyetje serioze mbi sigurinë e klinikave private dhe mungesën e kontrolleve të rrepta në këtë sektor. Hetimet vazhdojnë për të përcaktuar përmasat e dëmit ekonomik dhe rrezikun shëndetësor që kjo klinikë mund t’u ketë shkaktuar pacientëve të saj.
