Një 21-vjeçar shqiptar, i identifikuar si Mattia Selaj, i rritur në Piove di Sacco, Itali, ka ndërruar jetë të premten në mbrëmje pas tre ditësh në gjendje kritike në spitalin e Padovës, si pasojë e një aksidenti të rëndë rrugor.
Ngjarja ndodhi të mërkurën në mëngjes, në rrugën Strada dei Vivai, pranë Sant’Angelo di Piove, ndërsa i riu po shkonte në punë me motoçikletën e tij.
Sipas informacioneve paraprake, Mattia goditi pjesën e pasme të një furgoni Opel të ndalur në anë të rrugës për shkak të një defekti teknik. Pas përplasjes, ai përfundoi në korsinë e kundërt, ku u godit nga një makinë tjetër që po vinte nga drejtimi i kundërt, e drejtuar nga një grua 49-vjeçare.
Lexo edhe:
Ambulancat mbërritën menjëherë në vendngjarje dhe ai u transportua në Njësinë e Kujdesit Intensiv të Spitalit-Universitar të Padovës, por përpjekjet për ta shpëtuar rezultuan të pasuksesshme. Policia rrugore ka nisur hetimet dhe të dy drejtuesit e mjeteve janë nën hetim për vrasje në rrugë, për të përcaktuar përgjegjësitë.
Mattia ishte një djalë i njohur dhe i dashur në komunitetin e Piove di Saccos. Ai kishte nisur së fundmi punë në Padova dhe ëndërronte të krijonte biznesin e tij. Vdekja e tij ka lënë pas një boshllëk të madh te familjarët dhe miqtë e tij. Prindërit, Festim dhe Shqipe, dhe motra e tij, janë të shkatërruar nga dhimbja.
Të premten në mbrëmje, ndërkohë që lajmi për ndarjen nga jeta të Mattias u përhap, qindra të rinj u mblodhën pranë kishës së Sant’Anna në Piove di Sacco për një ceremoni përkujtimore. Ata ndezën fishekzjarrë dhe mbajtën bluza të Interit, skuadra e zemrës së Mattias.
“Mattia kishte një zemër të madhe, një djalë me ëndrra të mëdha që nuk e meritonte të largohej kështu,” tha kushëriri i tij Rajmond.
