Zgjedhja e kryetarit të ri të Autoritetit të Konkurrencës ka “përplasur” jo vetëm mazhorancën dhe opozitën në Komisionin e Ekonomisë.
Ka qenë edhe deputeti i PS, Erion Braçe, ai i cili ka dalë kundër propozimit të mazhorancës lidhur me propozimin si kandidaturë, emrin e ish-kryetarit të Komisionit Qendror të Zgjedhjeve, Denar Bibën, në krye të Autoritetit të Konkurrencës.
Sipas Braçes, Biba nuk është i formuar dhe se nuk ka ekspertizën e duhur për të drejtuar një institucion si Autoriteti i Konkurrencës.
Lexo edhe:
“Zoti Biba ka qenë në një detyrë shtetërore përveç KQZ-së për të cilën kam rezervat e mia. Do ishte mirë tja thoja në sy, dhe nëse do kishte ndonjë gjë, ta sqaronim këtu. E dyta, për mua, kandidatura e zotërisë, ka tre probleme. E para, zotëria është një pedagog shumë i mirë i të drejtës Kushtetuese, një pjesë të mirë të jetës e ka kaluar në të tilla fusha, është ekspert i asaj fushe, por të them të drejtën në fushën që e kemi ngarkuar si kryetar i Autoritetit të Konkurrencës nuk ka ndonjë ekspertizë me aq sa kam lexuar nga jetëshkrimi. Po ka lidhje e njeh shumë mirë fushën e zgjedhjeve, e njeh të drejtën kushtetuese, por në këtë lëmin që po e ngarkojmë me përgjegjësi, siç e ngarkuam në lëmin e prokurimeve publike, nuk ka ekspertizë.
Më vjen të them që në këtë fushë nuk ka lidhje. E dyta, kam rezerva për integritetin e zotërisë. Po e lëmë me kaq, kur të jetë përballë ia them. Në Shqipëri po zhvillohen procese kushtetuese, dhe kam vetëm një qëndrim për të gjithë.
Puna e bërë deri më tani në autoritetin e Konkurrencës, është thelbësisht negativ, i jam referuar qëndrimeve publike të marra në atë institucion. Kam lexuar çdo germë të qëndrimeve të tij atje. Vlerësimi është negativ. Nuk është kuptuar fare roli i atij institucioni, ai është për të mbrojtur interesin publik. Përtej interesit publik, në mbrojtje të 10 kompanive, nuk është përmbushje e detyrës” – tha Braçe.
