Tiranë, Qershor 2025 – Pavarësisht një ndalese të qartë ligjore, kompania që qëndron pas IQOS – produkti i shumëdebatuar që ngroh duhanin pa e djegur – po shkel hapur ligjin shqiptar duke realizuar fushata të fshehta reklamimi në media dhe rrjete sociale.
Sipas Ligjit Nr. 9636, datë 6.11.2006, i ndryshuar “Për mbrojtjen e shëndetit nga produktet e duhanit”, çdo formë reklamimi, promovimi dhe sponsorizimi i produkteve të duhanit është e ndaluar në territorin e Shqipërisë. Kjo përfshin edhe pajisje si IQOS, të cilat përmbajnë duhan dhe klasifikohen si produkte duhani.
Lexo edhe:
Megjithatë, një vëzhgim i Vip Magazine tregon se IQOS është duke realizuar:
- Reklama të fshehta përmes artikujve të paguar në media online, të paraqitura si “përmbajtje informuese”.
- Promovime përmes influencuesve shqiptarë në Instagram e TikTok, të cilët përdorin pajisjen pa e shënuar si reklamë.
- Aktivitet promovues në formën e eventeve “lifestyle” dhe lounge të sponsorizuara në mënyrë jo-transparente.
Ministria e Shëndetësisë dhe Mbrojtjes Sociale ende nuk ka reaguar ndaj këtyre zhvillimeve, ndërsa organizatat që merren me mbrojtjen e shëndetit publik e kanë konsideruar këtë si një kërcënim serioz për shëndetin e të rinjve dhe një precedent të rrezikshëm në zbatimin e ligjit.
“Ky është një shembull tipik i reklamës së maskuar dhe shkeljes së ligjit. Ne kemi parë të njëjtin model në vende të tjera ku duhani përpiqet të rikthehet përmes teknologjisë,” – tha një ekspert i shëndetit publik për Vip Magazine.
A po mbyllin sytë autoritetet shqiptare ndaj një fushate reklamimi që shkel ligjin? Kush përfiton nga kjo tolerancë? Vip Magazine do të ndjekë këtë histori me të tjera investigime në ditët në vijim.
