Netflixi ka lajmëruar së fundmi se planifikon të parandalojë ndarjen e fjalëkalimeve midis njerëzve dhe askush nuk po e pret mirë këtë gjë.
Kompania tha në një deklaratë se në të kaluarën ajo ka inkurajuar ndarjen e llogarive midis 222 milionë abonentëve të saj, me veçori të tilla si profilet dhe transmetimet e shumta, por shtoi se kjo po ndikon te aftësitë e tyre për të investuar në TV dhe filma të rinj.
Netflix tha se nuk do të ndalojë ndarjen e fjalëkalimeve në mënyrë kategorike, por ata që e bëjnë këtë do të duhet të paguajnë më shumë se të tjerët. Ky ndryshim do të testohet fillimisht në tre vende – Kili, Kosta Rika dhe Peru.
Nga ana tjetër, shumë njerëz kanë reaguar të revoltuar në rrjetet sociale. “Netflix do të humbasë shumë klientë nëse bëjnë këtë gjë.”- shkroi një përdoruese e Twitter.
Sipas ndryshimit të parashikuar, përdoruesit që nuk paguajnë do të jenë në gjendje të transferojnë profilet e tyre në llogaritë e tyre, duke ruajtur personalizimet si “Lista ime”, shikimin e historisë dhe rekomandimet që bën Netflix.
“Ne e kuptojmë se njerëzit kanë shumë zgjedhje argëtimi, kështu që ne duam të sigurojmë që çdo veçori e re të jetë fleksibël dhe e dobishme për anëtarët, abonimet e të cilëve financojnë të gjitha televizionet dhe filmat tanë të shkëlqyer,” thuhet në deklaratë.
Kjo nuk është hera e parë që Netflix provon mënyra për t’i bërë njerëzit të paguajnë për llogaritë e tyre. Në mars 2021, kompania filloi testimin e verifikimit me dy hapa, në të cilin pas hyrjes në llogari, përdoruesit do të duhej të fusnin një kod që do të dërgohej në telefonin ose e-mailin e pronarit të llogarisë.
Netflix ngriti çmimet e abonimeve mujore për përdoruesit në SHBA në tetor 2020 dhe përsëri në janar, duke e çuar çmimin nga 13,99 dollarë në 15,49 dollarë.
