Detaje të reja në lidhje me aksidentin tragjik në Prrenjas, ku humbën jetën burrë dhe grua, pasi makina me të cilën udhëtonin përfundoi në përroin e Lengajcës.
Viktimat janë Arjan Yze dhe Majlinda Yze. Ata ishin nisur nga Tirana mbrëmjen e djeshme dhe dyshohet se gjatë natës janë përfshirë në aksident. Autoritete po punojnë për të nxjerrë trupat e pajetë.
“Rreth orës 07:45, në aksin rrugor “Librazhd-Prrenjas”, 55-vjeçari A. Y., banues në Devoll, duke drejtuar automjetin tip “Volkswagen”, ka humbur kontrollin mbi drejtimin e automjetit dhe për pasojë automjeti ka dalë nga rruga dhe ka rënë në përroin e Lengajcës.
Nga ky aksident kanë humbur jetën ai dhe bashkëshortja e tij, shtetasja M. Y., rreth 50 vjeçe, e cila ishte pasagjere në këtë automjet.
Shërbimet e Policisë dhe ato të Zjarrfikëses ndodhen në vendin e ngjarjes dhe vijojnë punën për nxjerrjen e trupave të të 2 shtetasve që ndodheshin në automjet.
Grupi hetimor vijon punën për zbardhjen e plotë të rrethanave të këtij aksidenti”, njofton Policia.
