Personazhi i TikTok, Kleviol Ahmeti, njohur edhe si Cllevio, është ekstraduar nga Dubai drejt Shqipërisë, pas një operacioni të përbashkët mes Interpolit Shqiptar dhe Interpol Abu Dhabit, në kuadër të operacionit ndërkombëtar “The Wanted”.
I arrestuari, me inicialet K. A., ishte shpallur në kërkim ndërkombëtar nga autoritetet shqiptare, pasi ndaj tij ishin lëshuar dy masa sigurie nga gjykatat e Tiranës dhe Fierit.
Sipas Policisë së Shtetit, Gjykata e Apelit e Juridiksionit të Përgjithshëm Tiranë në vitin 2024 i kishte caktuar masën e sigurisë “arrest në burg” për veprën penale “Përndjekja”, pasi akuzohet se për disa vite kishte përndjekur fizikisht dhe përmes rrjeteve sociale shtetasin R. R. dhe familjarët e tij.
Lexo edhe:
Po ashtu, Gjykata e Fierit e ka dënuar në të njëjtin vit me 9 muaj burg për veprën penale “Largimi i të burgosurit nga vendi i qëndrimit”, pasi kishte thyer masën e sigurisë së dhënë më parë.
Pas përfundimit të procedurave ligjore në Emiratet e Bashkuara Arabe, 39-vjeçari është sjellë në Shqipëri ku do të përballet me drejtësinë për veprat penale të mësipërme.
