Historia e Myzerim Zenelit, 20 vjeç, kamarieri që mori plumbin në zemër ndërkohë që familja Ferracaku dhe ajo Gocaj përleshej me armë zjarri se kush do të merrte më shumë tokë në bregdetin e Velipojës për të vendosur shezlongët, ka prekur mbarë vendin. Për 20-vjeçarin ishte dita e parë e punës. Ndikuar nga gjendja e vështirë ekonomike, ai punonte sa herë kishte mundësi.
Së fundmi, familjarët e të ndjerit kanë bërë rrëfime prekëse. Kushëriri i Myzerimit, Fejzi Zeneli tha për “Shqipëria live” se babai ka vdekur kur ai ishte i vogël, duke lënë dy djem jetim.
“KANË QENË TË VARFËR. I ATI E KA LËNË SHUMË TË VOGËL. NËNA E TIJ KA PASUR VETËM RROGËN, SI RROBALARËSE NË SPITAL, ME TË CILËN MBANTE TRE VETË. KA PASUR DHE NJË PENSION TË VOGËL, 50 MIJË LEKË TË VJETRA”, TREGOI KUSHËRIRI.
Lexo edhe:
Ndërsa tezja e 20-vjeçarit, mes lotëve kujton për karakterin e dashur dhe optimist të Myzerimit.
“Më kujtohet që e pyeta për një palë atlete të shqyera që mbante veshur. I thashë nuk ke të tjera? Tha më pëlqejnë këto”, rrëfen ajo.
Shkak i sherrit që solli masakrën ishte konflikti mes Ferracakut dhe Gocajt për hapësirën e rërës përpara hoteleve për vendosjen e shezlongeve. Nga një shkëmbim me armë zjarri humbën jetën 4 personave. Viktima mbetën, biznesmeni Kujtim Ferrcaku, 59 vjeç, pronar i hotel “Fantazia”, vëllezërit Xhovani dhe Edmond Gocaj 25 dhe 38 vjeç që kishin hotelin “Gocaj” dhe Musaen Zenelit 20 vjeç, që e kapi një plumb në zemër dhe i mori jetën në vend. Nga përplasja me armë u plagosën po ashtu edhe Hasan Ferracaku, vëllai i biznesmenit që u vra dhe nipi i tij Elmedin Tyli. Dy të plagosurit u arrestuan për ngjarjen, ndërsa në kërkim janë shpallur tre vëllezër; Abedin, Shyqyri dhe Besar Verracaku, banues në fshatin Pulaj, të dyshuar si bashkautorë në krim.
