Një numër gjithnjë e në rritje përdoruesish i drejtohen ChatGPT për të folur rreth çështjeve të tyre personale, duke besuar se bisedat janë private. Por CEO i OpenAI, Sam Altman, paralajmëron se kjo bindje mund të jetë e gabuar dhe potencialisht e rrezikshme.
Sipas Altman, ndarja e problemeve më personale me inteligjencën artificiale është bërë shumë e zakonshme, megjithatë, nuk ka asnjë garanci se këto biseda mbeten tërësisht private.
Në një intervistë të fundit në podcast-in This Past Weekend me Theo Von, Altman theksoi se ndryshe nga bisedat me një psikolog apo avokat, ato me ChatGPT nuk mbrohen nga ligji në të njëjtën mënyrë.
“Nëse flet me ChatGPT për çështje shumë personale dhe më vonë ka një proces ligjor, ne mund të jemi të detyruar t’i dorëzojmë ato biseda,” paralajmëroi Altman.
Ai tha se të rinjtë, veçanërisht, po i drejtohen gjithnjë e më shumë inteligjencës artificiale për mbështetje emocionale. Shumë e shohin ChatGPT si një hapësirë të sigurt për të folur rreth ankthit, vetmisë, marrëdhënieve apo edhe depresionit.
Por, a është kjo hapësirë vërtet e sigurt? OpenAI ruan bisedat deri në 30 ditë dhe në disa raste mund t’i mbajë për arsye ligjore apo sigurie. Kjo do të thotë se nuk fshihen gjithmonë automatikisht, siç mendojnë shumë përdorues.
Altman nënvizon nevojën për krijimin e një kuadri ligjor që mbron bisedat mes përdoruesve dhe AI-së, ashtu siç ndodh me terapistët apo mjekët.
“Është një çështje shumë e madhe, e cila nuk ekzistonte një vit më parë. Tani duhet ta trajtojmë urgjentisht,” theksoi ai.
Pra, nëse përdor ChatGPT për të shprehur vështirësi emocionale apo psikologjike, mbaj parasysh:
Bisedat nuk mbrohen ligjërisht
Mund të rikuperohen për arsye ligjore
Nuk zëvendëson ndihmën profesionale nga një psikolog apo terapist
