Aktori i humorit Julian Deda ka folur lidhur me profesionin e tij si aktor humori për të cilin u shpreh se kur ishte i vogël nuk e ka dashur fare edhe pse babai e merrte me vete kudo.
Sot ai shprehet se e do shumë punën që ai bën, ndërsa shprehet se edhe ai është një njeri si gjithë të tjerët me halle dhe probleme pavarësisht se shfaqet si ‘ku rafsha mos u vrafsha’.
Ndërsa sa i përket seriozitetit, Deda shprehet se i pjesa më e rëndësishme e humorit.
“Kjo puna e aktorit është fiks dardha që bie nën dardhë sepse unë nuk e kam dashur si profesion. Deri në gjimnaz ishte gjëja që nuk doja të bëja, kam pasur dhe kompleksin që të flisja me njerëzit, si natyrë dhe ndoshta prej kësaj nuk e kam dashur si profesion. Por kjo në adoleshencë, pasi tani jam hapur aq shumë sa nuk mbyllem dot më. Që në moshë të vogël Zefi më merrte me vete, shkonim në teatër dhe kështu detyrimisht disa gjëra kanë mbirë tek mua dhe kur isha 16-17 vjeç mora pjesë te një komedi në Shkodër dhe aty i ndjeri Bardh Spaja më tha se do vazhdosh për aktor dhe mos u mundo për asgjë tjetër. Babai më thoshte bëj si të duash vetë nuk më ka imponuar për asgjë, i vetmi imponim i tij ka qenë që të jem korrekt me njerëzit në përballje me to, kur flas me to dhe të tregojë njerzillëk dhe jo arrogancë.
Kur kam ardhur në shkollë kisha një zjarr të brendshëm dhe tani e dua shumë si profesion. Unë jam brez i vejtër e kam studiuar 4 vjet se tani është kthyer në 3 plus 2. Unë jam një njeri me halle, kam probleme, jetoj dhe unë në Shqipëri, kam dhe unë pluhurin te dera, kam vështirësitë e mia si njeri, nuk jam njeri me shofer, punët e mia i bëj vetë dhe jo të tjerët, kam hallet si të gjithë. Sa i përket seriozitetit mund të them se ai është pjesa më e rëndësishme e humorit. Aktorët e humorit ne i quanim aktorët e dramës minus që është më e vështirë. Në studime përmendet shpesh që humori është shkalla më e lartë e seriozitetit. Nuk mundesh të bësh humor nëse nuk je serioz, plus që aktorët e humorit besoj se janë aktorët më të ndjeshëm në këtë zhanër sepse ndjeshmëria që e percepton një situatë është dyfish me ndjeshme se sa e percepton një njeri tjetër”.
