Autoritetet në SHBA po ndjekin zhvillimet lidhur me vrasjen tragjike të tre motrave që tronditi vendin. Viktimat u gjetën pa shenja jete pranë automjetit të të atit, i cili dyshohet të jetë edhe vrasësi i tyre.
Detaje të tjera tronditëse janë bërë të ditura nga autoritetet vendase, ku sipas dosjes hetimore, trupat e pajetë të vajzave u gjetën me qese plastike në kokë dhe me duart të lidhura.
Autopsia paraprake sugjeron se shkaku më i mundshëm i vdekjes ishte asfiksia. Mediat amerikane, përfshirë New York Post, raportojnë se vajzat kishin veshur të njëjtat rroba që mbanin ditën e premte, kur u raportuan të zhdukura.
Lexo edhe:
Paityn Decker (9 vjeçe), Evelyn Decker (8 vjeçe) dhe Olivia Decker (5 vjeçe) u gjetën pa shenja jete të hënën, më 2 qershor, pas një takimi me të atin.
Atë ditë, Travis Decker mori vajzat në një takim rutinë, sipas marrëveshjes me nënën e tyre, me të cilën ishte divorcuar, por nuk i ktheu në kohën që dy ish-partnerët kishin rënë dakord. Si pasojë, ndaj tij u lëshua një urdhër arresti për shkelje të kujdestarisë.
Më pas hetimet lokalizuan automjetin e tij dhe zbuluan skenën e krimit. Po ashtu, u gjetën dy gjurmë gjaku në formë pëllëmbe në pjesën e pasme të furgonit, ndërsa të dhënat nga telefoni i 32-vjeçarit tregojnë se të shtunën ai ndodhej pikërisht në zonën ku më pas u gjetën trupat e të ndjerave.
Ai është shpallur në kërkim, ndërsa autoritetet kërkojnë edhe ndihmën e qytetarëve për të bërë të mundur kapjen e tij.
