Kristian Marku, personi që shihni në foto, është 30-vjeçari i vrarë mbrëmjen e kaluar në Novoselë të Vlorës.
I riu, me origjinë nga Rrësheni, ishte duke udhëtuar drejt Vlorës, kur persona ende të paidentifikuar qëlluan me breshëri plumbash në drejtim të mjetit me të cilin ai po lëvizte. Marku ka marrë tre plumba në trup, ndërkohë që makina e tij ka vijuar të lëvizë për rreth 400 metra, përpara se të përplasej me trafikndarësen dhe të ndalej.
30-vjeçari do të përcillet për në banesën e fundit nesër në Rrëshen. Ai ishte babai i një fëmije të mitur dhe dyshimet janë se ai mund të jetë nxjerrë në pritë ditën e djeshme.
Lexo edhe:
Për zbardhjen e këtij atentati vëmendja e policisë është përqendruar në Rrëshen. Sipas burimeve, gjatë natës blutë kanë ushtruar kontrolle në banesat e familjes së Kastriot Reçit dhe kanë shoqëruar katër anëtarë të këtij fisi. Ata janë marrë në pyetje në lidhje me krimin, por kanë mohuar të kenë dijeni dhe lidhje me ekzekutimin e 30-vjeçarit.
Marku, i njohur ndryshe edhe si Kristjan Bardhi, është akuzuar për përfshirje në atentatin e dështuar ndaj Sajmir Reçit, nipi i Kastriot Reçit. Ky i fundit u vra me snajper në mes të qytetit të Rrëshenit 5 vite më parë.
