Robert Nolfe, ish-bashkëshorti i këngëtares së njohur shqiptare Parashqevi Simaku, ka ndarë për herë të parë mendimet e tij mbi marrëdhënien, divorcin dhe jetën pas ndarjes. Në një intervistë emocionuese, ai trajton tema të ndjeshme që lidhen me familjen dhe ndikimin e këngëtares në kulturën shqiptare.
“Ka shumë keqinformime,” – tha Nolfe, duke nënvizuar se shumë nga ato që përfliten për jetën e Parashqevisë nuk pasqyrojnë realitetin. “Ajo ishte një artiste unike, një zë i ëmbël dhe një ikonë e kulturës shqiptare. Në skenë shkëlqente, por jashtë saj ishte një njeri i thjeshtë dhe i rezervuar.”
Lidhur me divorcin, Nolfe u shpreh se zgjedhjet personale të Parashqevisë ishin ndër arsyet kryesore të ndarjes, por theksoi se gjithmonë ka dashur që ajo të jetë mirë. “Nuk dua të hyj në detaje, por gjithmonë e kam vlerësuar si një figurë të rëndësishme për shqiptarët.”
Lexo edhe:
Duke folur për të birin, Eltonin, Nolfe tha se ai ka qenë një mbështetje e madhe në këtë proces. “Që kur ka qenë 10 vjeç, i është kërkuar mendimi. Sot është një djalë i pjekur dhe dëshiron që familja të ribashkohet. Është një dëshirë që e ndaj dhe unë.”
Në intervistë, Nolfe preku edhe rolin e medias në trajtimin e këtyre çështjeve, duke bërë thirrje për më shumë përgjegjshmëri. “Është koha që të analizojmë më mirë të kaluarën tonë dhe të ndalojmë manipulimet e vazhdueshme. Realizmi i asaj kohe duhet trajtuar me drejtësi dhe transparencë.”
Përkundër sfidave të së shkuarës, ai shpreh shpresën që historia e tyre të përfundojë në mënyrë të bukur. “Parashqevia mbetet një thesar i kulturës shqiptare, dhe unë shpresoj që ajo të rigjejë vendin e saj të merituar.”
