Fjolla Morina ka reaguar pas aktgjykimit të shpallur në Hagë ndaj ish-krerëve të UÇK-së, ndërsa krahas qëndrimit të saj për vendimin, këngëtarja ka ndarë edhe një fotografi personale nga viti 1999.
Në reagimin e publikuar në Instagram, Morina kërkoi ndërhyrjen e Shteteve të Bashkuara në fazën e apelit, duke shprehur hapur kundërshtimin e saj ndaj dënimeve.
Këngëtarja shkoi më tej duke kërkuar edhe reagim nga Kuvendi i Kosovës. Ajo deklaroi se personave që kanë dëshmuar kundër ish-krerëve të UÇK-së duhet t’u hiqet shtetësia e Kosovës, ndërsa iu referua Kroacisë si shembull. Ky është një qëndrim i shprehur nga vetë Morina dhe jo një masë e njoftuar nga institucionet e Kosovës.
Lexo edhe:
Por krahas reagimit për procesin në Hagë, vëmendjen e mori një tjetër InstaStory. Fjolla publikoi një fotografi bardhezi nga viti 1999, duke rikthyer një moment të vështirë nga periudha e luftës në Kosovë.
Në pamje ajo shihet shumë e re, në gjendje të fikëti dhe e mbajtur nga personat që ndodhen pranë saj.
“Asnjëherë nuk harrohet ajo që e përjetova”, shkroi Morina mbi fotografinë, duke shënuar poshtë saj vitin “1999”.
Me këtë publikim, këngëtarja e lidhi reagimin e saj të sotëm me përvojën personale gjatë luftës, pa dhënë detaje të tjera për rrethanat konkrete në të cilat është realizuar fotografia.
Reagimi i saj është një prej shumë që kanë ardhur pas aktgjykimit të 16 shtatorit, ndërsa vendimi i shpallur në Hagë është i shkallës së parë dhe çështja mund të vijojë në Apel.
