Princ Leka dhe Princeshë Blerta Celibashi Zogu kanë rrëfyer emocionet dhe përjetimet e tyre pas ardhjes në jetë të djalit, Aleksandrit, duke folur për momentet e para si prindër dhe për jetën e tyre të re familjare. Intervista është dhënë për revistën “News Bomb”, ndërsa Vip Magazine sjell për ju disa pasazhe të shkëputura nga kjo intervistë e parë tashmë si familje.
Duke folur për momentin e lindjes së të birit, Princeshë Blerta ka treguar emocionet e forta që përjetoi teksa priste ta mbante për herë të parë në krahë.
“Mbaj mend që ndiqja me lot në sy çdo lëvizje të stafit mjekësor derisa ma sollën pranë. Atë moment ndjeva lëkurën e butë të Aleksandrit dhe kuptova se çfarë ishte lumturia. Nuk ekzistonte më as lodhja, as frika, e asgjë tjetër shqetësuese. Kishte vetëm një ndjenjë të thellë mirënjohjeje që ai kishte ardhur në jetë shëndoshë dhe se më në fund mund ta mbaja në krahë. Është ai moment kur e kupton se zemra jote do të rrahë përgjithmonë edhe jashtë trupit tënd.”
Lexo edhe:
Princ Leka ka folur për mënyrën se si ai dhe Blerta ndajnë kujdesin për të porsalindurin, duke theksuar rëndësinë e përfshirjes së babait në këtë periudhë.
“Mendoj se nuk është turp të kujdesesh për fëmijën tënd, sidomos kur është i porsalindur. Unë nuk hezitoj t’ia ndërroj pelenën, ta vë në gjumë apo ta mbaj në krah kur Blerta nuk mundet, madje i bëj këto edhe kur ajo mundet. Sot për disa baballarë vijon të jetë tabu kujdesi ndaj një të porsalinduri, por kush nuk e bën, ta dijë se po humbet një nga eksperiencat më të mrekullueshme të jetës.”
Në një tjetër pasazh, Princ Leka ka folur për marrëdhënien me Princeshë Blertën dhe momentet që ndajnë gjatë kujdesit për djalin.
“Zgjohemi të dy, Blerta kujdeset për të voglin, e unë për Blertën. Ndoshta ajo nuk ka gjithmonë nevojë për mua, por të them të drejtën e shijoj kur shoh atë marrëdhënie aq të bukur nënë e bir.”
Çifti ka folur gjithashtu për zgjedhjen e emrit të djalit, Aleksandër, duke shpjeguar lidhjen e tij me historinë dhe traditën familjare.
“Emrat kanë rëndësi, sepse mbartin histori, identitet dhe vazhdimësi. Ne e kishim menduar prej kohësh emrin Aleksandër. Dëshironim që emri të ishte vazhdimësi e traditës së familjes mbretërore, por nuk donim që ta quanim Leka III, kështu që zgjodhëm versionin europian të shkruar në shqip të emrit tim dhe të babait: Aleksandër. Ishte zgjedhja më e natyrshme, sepse Leka është forma tradicionale shqipe e emrit Aleksandër. Në një farë mënyre, është i njëjti emër, thjesht në dy forma të ndryshme. Kështu ruhet vazhdimësia e traditës familjare, por njëkohësisht i jepet edhe identiteti i tij i veçantë. Zgjodhëm edhe drejtshkrimin shqiptar, Aleksandër me “ks” dhe “ë”, sepse donim që emri i tij të ishte në formën e gjuhës sonë.”
Një moment veçanërisht emocionues për familjen ka qenë takimi i Geraldinës me vëllanë e saj të vogël. Princ Leka ka rrëfyer emocionet që përjetoi kur pa marrëdhënien e parë mes dy fëmijëve.
“Geraldina ishte me pushime me mamanë e saj kur lindi Aleksandri dhe, në ditën që u kthye në Tiranë, gjëja e parë që kërkoi me insistim ishte të takohej me vëllanë e saj. Takimi mes të dyve më bëri të përlotesha, kur shihja që vajza i këndonte ninulla dhe shqetësimin që kishte kur e dëgjonte që qante. Për ne është e rëndësishme që ata të rriten jo vetëm si motër e vëlla, por si miq të mirë. Tani jam i lumtur që ata kanë njëri-tjetrin.”
