Kinemaja botërore është në zi. Aktorja irlandeze Brenda Fricker, fituese e çmimit Oscar dhe e njohur për rolet e saj në filmat “My Left Foot”, “Home Alone 2” dhe serialin “Casualty”, ka ndërruar jetë në moshën 81-vjeçare.
Lajmi u konfirmua nga agjenti i saj, Phil Belfield, i cili i bëri një homazh prekës.
“Nuk do të shohim më kurrë dikë si Brenda. Bota është më e varfër pa të. Ishte një nder ta njihja, ta doja dhe të punoja me të. Ajo do të ketë gjithmonë një vend në zemrën time dhe në zemrat e miliona adhuruesve të filmit dhe televizionit në mbarë botën”, deklaroi ai.
E lindur në Dublin, Brenda Fricker hyri në histori në vitin 1990, kur u bë aktorja e parë irlandeze që fitoi çmimin Oscar, duke triumfuar në kategorinë Aktorja më e Mirë në Rol Dytësor për interpretimin e nënës së personazhit të Daniel Day-Lewis në filmin “My Left Foot”.
Filmi rrëfente historinë e vërtetë të Christy Brown, një artist irlandez i lindur me paralizë cerebrale, i cili mund të kontrollonte vetëm këmbën e majtë. Edhe Daniel Day-Lewis fitoi Oscar për rolin e tij protagonist.
Dy vjet pas suksesit në Oscar, Fricker fitoi zemrat e publikut në mbarë botën me rolin e gruas së zogjve në Central Park në filmin “Home Alone 2: Lost in New York”, ku krijoi një nga momentet më emocionuese të filmit së bashku me personazhin e Kevin McCallister, të luajtur nga Macaulay Culkin.
Një tjetër rol që e bëri shumë të dashur për publikun ishte ai i infermieres Megan Roach në serialin britanik “Casualty”, ku u shfaq për herë të parë në episodin debutues të vitit 1986 dhe vazhdoi të rikthehej deri në vitin 2010.
Gjatë karrierës së saj, Brenda Fricker interpretoi edhe në filma të njohur si “So I Married an Axe Murderer” (1993), “Angels in the Outfield” (1994), “A Time to Kill” (1996) dhe “Veronica Guerin” (2003).
Megjithatë, në një intervistë të dhënë vitin e kaluar për “The Times”, aktorja kishte rrëfyer se fitimi i Oscarit nuk i solli vetëm përfitime.
Sipas saj, suksesi bëri që producentët ta etiketonin për një lloj të caktuar rolesh, duke i mbyllur shumë dyer në teatër dhe kinema.
“Ekziston ajo që quhet ‘mallkimi i Oscarit’. Ka shumë gjëra që nuk janë të mira te ky çmim. Madje nuk të japin as para me të,” kishte thënë ajo me humor.
Zëvendëskryeministri i Irlandës, Simon Harris, e cilësoi Fricker si “një thesar kombëtar”, duke vlerësuar talentin dhe autenticitetin që ajo sillte në çdo rol.
“Brenda ishte një artiste e jashtëzakonshme që i dha thellësi dhe humanizëm çdo personazhi. Ajo ishte një nga ambasadoret më të mëdha të talentit irlandez në botë”, deklaroi Harris.
Edhe ambasadori amerikan në Irlandë, Edward Walsh, e quajti atë “një gjigante të kinemasë irlandeze”, ndërsa ish-kolegja e saj në serialin “Casualty”, Cathy Shipton, e përshkroi si “një nga njerëzit më autentikë që kishte njohur ndonjëherë”.
Në autobiografinë e botuar vitin e kaluar, Brenda Fricker zbuloi se kishte përjetuar një fëmijëri dhe adoleshencë të mbushur me trauma.
Ajo rrëfeu se ishte dhunuar fizikisht nga nëna, kishte qenë viktimë e manipulimit në moshë të vogël dhe më vonë kishte përjetuar edhe dy përdhunime, ngjarje që lanë gjurmë të thella në jetën e saj.
Pavarësisht sfidave, Fricker e përshkruante rrugëtimin e saj si një seri “rastësish të lumtura”, duke thënë se karriera e saj ishte ndërtuar më shumë nga fati sesa nga një plan i mirëfilltë.
