Mimoza Ahmeti po tërheq vëmendje të madhe në “Ferma VIP 3”, ku po cilësohet si fenomen i këtij sezoni falë sinqeritetit dhe batutave të saj. Megjithatë, kjo nuk është hera e parë që ajo përballet me një format të madh televiziv.
Së fundmi është rikthyer në fokus eksperienca e saj si opinioniste në “Big Brother Albania 8”, në kohën kur spektakli drejtohej nga Ledion Liço. Qëndrimi i saj në këtë rol rezultoi i shkurtër dhe u shoqërua me polemika të forta me produksionin.
Konflikti nisi në rrjetet sociale, pasi Ahmeti reagoi ndaj një fotomontazhi të publikuar në Facebook nga blogu i Olti Curri, duke e konsideruar si përpjekje për të nxitur një përplasje artificiale mes saj dhe një ish-konkurrenti, Edisonit. Edhe pse u sqarua se faqja nuk ishte zyrtare e programit, reagimi i saj mbeti i fortë.
Lexo edhe:
Nga ana tjetër, Curri i kërkoi më shumë tolerancë, duke theksuar se përmbajtja e tij ishte pjesë e stilit personal dhe nuk lidhej me produksionin e “Big Brother”.
Përplasjet nuk mbetën vetëm në rrjete sociale. Ahmeti shprehu hapur pakënaqësi edhe ndaj autorëve të programit për mungesë sqarimesh, ndërsa paralajmëroi dalje publike me Edisonin për të diskutuar çështjen — një veprim që binte ndesh me kontratën e saj.
Sipas raportimeve të kohës, largimi i saj lidhej edhe me arsye financiare. Ajo kishte deklaruar se pagesa prej 200 mijë lekësh për puntatë ishte e ulët krahasuar me opinionistët e tjerë.
Në fund, marrëdhënia mes Ahmetit dhe “Big Brother Albania 8” u ndërpre, duke lënë pas një histori polemikash që sot duket e zbehur përballë suksesit të saj aktual në “Ferma VIP 3”.
