Meteorologia Ladja Porja ka dhënë së fundmi detaje mbi reshjet e shiut që kanë përfshirë vendin që në fillim të muajit shkurt.
Ajo thekson se moti do të mbetet i paqëndrueshëm pothuajse gjatë gjithë muajit, ndërsa përmirësimi pritet në javën e fundit të shkurtit.
Sipas Porjas, shkurti do të karakterizohet nga temperatura relativisht të larta për stinën, por i shoqëruar me reshje të shpeshta shiu dhe rebeshe.
Gjithashtu ajo paralajmëroi se nesër priten stuhi të forta ere, kryesisht në zonat bregdetare, të cilat mund të shkaktojnë probleme në trafikun detar.
“Do mbetemi në kushte të paqëndrueshme atmosferike. Sot ka patur përmirësim të përkohshëm të motit. Reshjet e sotme nuk do jenë në sasi të mëdha, nesër pasdite pra të mërkurën, do ketë reshje më të dendura.
Edhe dita e enjte dhe e premte gjatë paradites do jetë me reshje dhe vranësira, ndërsa pasditeve do ketë rebeshe shiu. Fundjava parashikohet të jetë e paqëndrueshme gjithashtu.
Të gjitha ditët do jenë me reshje shiu, ku më të rrezikuarat do jenë dita e mërkurë dhe e dielë.
Kryesisht Shkodra, Lezha, dhe Durrësi do jenë ato qytete me intensitete të larta të shiut, pastaj dhe i gjithë jugu Vlora, Saranda, Gjirokastra, Permeti, Tepelena mbeten të ekspozuara nga rebeshet.
Nesër do të kemi stuhi të forta ere kryesisht në bregdet, duke sjellë problem në trafikun detar.
Sa i përket temperaturave, relativisht janë të larta, minimalet janë 4 gradë dhe maksimalet janë 18-19 gradë Celsius.
Deri në datën 20 shkurt parashikohet që reshjet ti kemi prezente. Përmirësim presim në javën e fundit të shkurtit, që do jenë pa reshje”, tha Porja për Euronews Albania.
