Metereologia e njohur, Lajda Porja, ishte mëngjesin e sotëm e ftuar në emisionin “Wake Up”, ku zbuloi se si do të jetë moti gjatë kësaj jave.
“Nëse kemi një muaj të ngrohtë, me temperatura të larta, është e pashmangshme fenomenet ekstreme si i rastit konkret, reshjet intensive. Nëntori ka shënuar temperatura në çdo ditë mbi vlerat e tij normale, të cilat janë 19.5-20 gradë. Kemi patur 25, 26, 27 gradë. Ka patur dje një temperaturë mjaft të lartë, ishte zagushi.
Ndërkohë sinjalet e stuhisë i kemi parë që të mërkurën dhe të enjten e shkuar, ishte një sistem aq i mirë organizuar sa ishte mjaft e vështirë që të zhvendosej. Reshjet tashmë kanë filluar në zonat veriore dhe parashikohet që orët vijuese sot të ndryshojnë intensitetin e tyre, pra do të kemi rritje të intensitetit. Është i vendosur pikërisht në veri, pra Shkodra, Puka, Lezha, Bajram Curri, Bulqiza, do marrin edhe sasi mjaft të mëdha të reshjeve”, tha Lajda.
Porja tregoi për “Wak Up” hartën me tre ngjyra, pink, jeshile e errët dhe një jeshile pak më e zbehtë.
“Ngjyra pink është intensiteti më i lartë i reshjeve. I gjithë veriu është i ekspozuar ndaj përmbytjeve dhe shirave intensive. Nuk është se ka ndonjë zonë aty që do t’i shpëtojë. Kemi reshje që do bien nga 200-340 mm, flasim në zona të banuara, për shembull në Shkodër në qytet, Vau i Dejës, Thethi, Iballja, Dragobia, Fierza, Komani. Janë të gjitha këto zona që mund t’a tejkalojnë dhe 300-350 mm.
Fati i mirë është që kaskadat janë nën nivel sepse kemi patur vetëm një ngjarje me reshje për gjithë nëntorin. Unë e kam thënë që nëntori është muaji më i lagësht për territorin shqiptar, 90 për qind të reshjeve vjetore duhet të bien përgjatë nëntorit. Shkodra e ka normën mujore 204-205 mm, pra të shpërndara në kohë.
Patjetër që kur kemi fenomene ekstreme përmbysin çdo lloj parashikimi, që do të thotë 200 mm ose më shumë, bien në intervalin kohor që do kemi reshje nga e marta deri të shtunën. Shkodra mund të ketë edhe 240 mm shi dhe mundësia e probabiliteti për përmbytje është shumë i lartë”.
