Pas zbërthimit të platformës së koduar Sky ECC, Prokuroria e Posaçme ka intensifikuar përpjekjet për të siguruar edhe një tjetër arsenal provash, këtë herë nga aplikacioni “Matrix”, një platformë e avancuar e komunikimit të enkriptuar që përdorej gjerësisht nga rrjetet kriminale ndërkombëtare, përfshirë ato shqiptare. SPAK është duke bashkëpunuar ngushtë me autoritetet holandeze për të marrë në dorë përgjimet e këtij aplikacioni, të cilat pritet të kenë një ndikim shumë më të thellë sesa ato të Sky ECC, duke qenë se mbulojnë një periudhë më të freskët kohore dhe përmbajnë informacione që lidhen me krime të rënda të viteve të fundit. Në kuadër të hetimeve që janë në zhvillim, janë dërguar disa letër-porosi me qëllim marrjen e komunikimeve të kryera përmes aplikacionit Matrix nga persona konkretë të hetuar nga SPAK. Në fokus janë eksponentë të rëndësishëm të botës së krimit, të përfshirë në trafikun ndërkombëtar të kokainës. Përveç kërkesave për përgjimet, Prokuroria ka kërkuar gjithashtu edhe dokumentacionin që lidhet me vlefshmërinë juridike dhe përdorshmërinë e të dhënave që janë siguruar nga ky aplikacion i koduar.
Të dhënat
Burime pranë SPAK bëjnë me dije se të dhënat që do të merren nga Matrix do të përdoren si prova materiale në proceset penale, ashtu siç është bërë tashmë me mesazhet e Sky ECC, shkruan Sot. Matrix është një platformë mesazhesh e ndërtuar posaçërisht nga kriminelët për të komunikuar në fshehtësi të plotë. Autoritetet evropiane arritën të sekuestronin serverat e aplikacionit dhe të rikuperonin 2.3 milionë mesazhe, të shkruara në 33 gjuhë të ndryshme, përfshirë edhe shqipen. Për herë të parë, kjo platformë doli në skenë në vitin 2021, kur u gjet në telefonin e një personi të dënuar për vrasjen e një gazetari holandez. Europol e ka cilësuar Matrix si një nga aplikacionet më të sofistikuara të krijuar ndonjëherë nga rrjetet kriminale. Ndryshe nga Sky ECC, që u mbyll në vitin 2021, Matrix ka qenë aktiv deri kohët e fundit, dhe për këtë arsye përmban të dhëna të vlefshme për ngjarje të ndodhura pas kësaj periudhe.
Lexo edhe:
Çfarë deklaroi Nuredin Dumani?
Në Shqipëri, aplikacioni është përdorur nga shumë personazhe të njohur të botës së krimit. Ndër të parët që pranoi përdorimin e tij ishte Nuredin Dumani, i cili në dëshminë e tij përmendi se përmes Matrix merrte porosi për atentate. Ai përmendi edhe emra të tjerë të njohur si Suel Çela. Kjo tregon se Matrix ka qenë një mjet i rëndësishëm në planifikimin e aktiviteteve kriminale, përfshirë trafiqet ndërkombëtare, pastrimin e parave dhe atentatet mafioze. Të gjitha këto komunikime janë tashmë në duart e Europol dhe pritet që SPAK, nëpërmjet bashkëpunimit me autoritetet holandeze dhe agjencitë evropiane të zbatimit të ligjit, të mund të përfitojë akses në ato që lidhen me qytetarë shqiptarë. Në qendër të këtyre hetimeve janë ngjarje të rënda kriminale që kanë ndodhur gjatë viteve 2022-2024 – periudhë e cila nuk mbulohet nga të dhënat e Sky ECC. Mes tyre janë vrasja e Brilant Martinajt dhe zhdukja misterioze e Vis Martinajt, ngjarje që tronditën opinionin publik dhe për të cilat ende nuk ka zbardhje të plotë.
“Tërmeti” në politikë
Tërmeti që mund të sjellë zbardhja e komunikimeve në Matrix pritet të jetë shumë më i madh sesa ai i Sky ECC. Jo vetëm për shkak të ngjarjeve të rënda që mbulon, por edhe për shkak të personazheve të përfshirë. Ka dyshime të forta se në komunikimet e zbërthyera do të përfshihen emra të politikës, sistemit të drejtësisë dhe forcave të rendit. Jo më kot, që kur ka nisur veprimtaria e SPAK, shumë zyrtarë e politikanë kanë hequr dorë nga përdorimi i rrjeteve të zakonshme të komunikimit si WhatsApp apo Messenger, duke kaluar te aplikacione të koduara si Matrix, nga frika e përgjimeve. SPAK është në pritje të një përgjigjeje zyrtare për letërporositë e dërguara, dhe gjithçka tregon se shumë shpejt në Shqipëri mund të mbërrijnë dosje me përmbajtje komprometuese që do të shërbejnë si prova kyçe në hetimet për krimin e organizuar dhe lidhjet e tij me politikën. Ajo që dikur ishte një platformë që garantonte siguri absolute për kriminelët, tashmë është kthyer në armën më të fortë në duart e drejtësisë. Dhe ajo që pritet të ndodhë pas zbardhjes së “Matrix” mund të jetë vetëm fillimi i një vale të re goditjesh në nivelet më të larta të krimit dhe pushtetit në Shqipëri.
