Mbretëresha Elizabeth II ndërroi jetë dy ditë më parë në moshën 96-vjeçare. Monarkja, e cila zhyti në zi Britaninë e Madhe me vdekjen e saj, ka lënë gjurmët e saj.
Si në jetën publike ashtu edhe në veshjet e saj, Mbretëresha Elizabeth ka ndjekur me besnikëri dhe respekt rolin e saj si monarke.
Për këtë arsye në paraqitjet e saj ka preferuar linjat klasike dhe të pastra, duke mbetur gjithmonë elegante dhe me stil. Ajo duket se nuk i interesonte shumë moda, por padyshim që kishte lançuar stilin e saj, i cili nuk kaloi pa u vënë re.
Mbretëresha Elizabeth ka veshur të gjitha ngjyrat e ylberit në daljet e saj publike, në 70 vite në krye të detyrës. Madje për këtë e ka një arsye!
Biografi i Pallatit Mbretëror, Robert Hardman, ka treguar se ajo vishej qëllimisht me ngjyra të ndezura që të binte në sy gjatë eventeve mbretërore.
Gjatësia nuk e favorizonte Mbretëreshën Elizabeth, ndaj ajo kishte zgjedhur ngjyrat që të tërhiqte vëmendje dhe të gjithë ta dallonin lehtë ku ndodhej.
Në biografinë që i shkroi në vitin 2011, “Our Queen”, Hardman s’la pa përmendur këtë citim që i mbeti në mendje nga Mbretëresha: “Nëse do të vishja ngjyrën bezhë, askush s’do ta dinte kush jam”.
Ndërkohë Hazel Clark, profesoreshë e modës në shkollën Parsons, beson se zgjedhjet e veshjeve të Mbretëreshës zbuluan qartë stilin e saj personal.
“Unë do të preferoja t’i përshkruaja zgjedhjet e veshjeve të mbretëreshës si “jo modë “, por me një sens shumë të fortë stili, të cilin ajo e zhvilloi dhe e përsosi gjatë gjithë jetës së saj. Ndjenja e qëndrueshmërisë në pamjen e saj krijoi besim dhe jetëgjatësi”, tha Clark.
