Një tjetër krim në familje ka ndodhur këtë fundjavë në vend. Një 31-vjeçare nga Gana u qëllua për vdekje nga i dashuri i saj shqiptar, ndërsa më pas ky i fundit u vetëflijua.
Ngjarja në fjalë ndodhi pasditen e së shtunës në bulevardin “Gjergj Fishta” në Tiranë. 31-vjeçarja ganeze me shtetësi franceze kishte mbërritur në Tiranë mesditën e së shtunës, ndërsa kishte rezervuar një apartament me qira ditore në Tiranë, ku do të qëndronte me të dashurin e saj shqiptar 26-vjeçarin nga Dibra, Klinton Pira, i cili pak kohë më par kishte mbërritur nga Anglia. Sipas policisë, pas një sherri në banesë, i riu ka goditur me thikë partneren e tij. Kjo e fundit më pas ka dalë nga banesa për të kërkuar ndihmë, por ka mbërritur pa jetë në spital.
26-vjeçari i tronditur nga ngjarja është hedhur nga kati i tetë i pallatit duke ndërruar jetë në vend. Gjatë sherrit ai e ka goditur disa herë me thikë partneren e tij ganeze, ndërsa shumica e plagëve janë konstatuar në pjesën e gjoksit. Dyshohet se një nga plagët kanë qenë pranë zemrës, gjë që mund t’i ketë shkaktuar asaj vdekjen. Në banesën ku ajo po qëndronte janë gjetur vetëm rroba. Sipas burimeve, Policia e Tiranës ka ngritur dy pista hetimi për vrasjen e 31-vjeçares ganeze me shtetësi franceze, që u qëllua me thikë të shtunën nga 26-vjeçari Klinton Pira, i cili pas aktit i dha fundit jetës duke u hedhur nga kati i 8.
Grupi hetimor dyshon se çifti ka pasur debate, që janë dëgjuar dhe nga fqinjët për çështjen e dokumenteve angleze që i riu priste të pajisej pas martesës me 31-vjeçaren. Refuzimi i martesës nga ganezja dyshohet se ka bërë që debati mes tyre të degradojë. Por hetimet janë shtrirë edhe në një tjetër pistë, ku mendohet që konflikti të kenë lindur për shkaqe xhelozie. Për këtë arsye, janë marrë në pyetje familjarët e 26-vjeçarit, të cilët e kanë shoqëruar në aeroport viktimën, që vajti për ta marrë 31-vjeçaren nga Gana. Kushëriri i të riut mësohet të ketë thënë në dëshminë përpara policisë se gjatë transportit me makinë nga aeroporti, dy të rinjtë kishin qenë shumë të përzemërt me njëri-tjetrin, duke mos shfaqur asnjë mosmarrëveshje. Për të sqaruar dyshimet, grupi hetimor, është duke këqyrur dy telefonat e çiftit, nga ku pritet të hidhet dritë mbi motivin që çoi në krimin e rëndë.
Krimet në familje
Dy muajt e fundit ka pasur një numër të lartë krimesh në familje në vendin tonë. Një ngjarje e ngjashme ndodhi në Fier, ku ish-bashkëshorti qëlloi për vdekje 23-vjeçaren Sabrina Bengaj. Ngjarja e rëndë ndodhi në fshatin Zhupan në familjen e Partizan Bengaj ku Elton Metaj ka shkuar në banesën e ish-gruas së tij dhe pasi e ka nxjerrë jashtë shtëpisë e ka qëlluar për vdekje nga mbrapa me armë zjarri tip automatik. Pas vrasjes së ish-gruas së tij ai është larguar nga vendi i ngjarjes ku është kapur nga policia pas tre orësh nga kryerja e krimit. Ai doli më pas para gjykatës për t’u njohur me masën e sigurisë, ku dhe pranoi krimin.
Në fjalën e tij para gjykatës u shpreh se e donte Sabrinën, ndërsa sa i takon kallashnikovit deklaroi se e mori për vetëmbrojtje pasi ish-vjehrri i tij e kërcënonte. Pak ditë më pas në Divjakë burri qëlloi për vdekje bashkëshorten. Dyshohet se shkak i krimit ishte varfëria.
