Shpërthim me lëndë plasëse në portën hyrëse të një garazhi në rrugën “Peti” në Tiranë.
Garazhi është në pronësi të 39-vjeçarit, Elvis Kosova, një emër i njohur për policinë, pasi është arrestuar më herët për vjedhje makinash.
Nga shpërthimi janë shkaktuar dëme të mëdha materiale te automjete të parkuara aty pranë.
Lexo edhe:
Ngjarja është shënuar rreth orës 03:50, ndërkohë që policia po këqyr pamjet filmike për të bërë të mundur identifikimin e autorit si dhe zbardhjen e ngjarjes.
Njoftimi i policisë:
Rreth orës 03:50, në rrugën “Peti”, dyshohet se në portën hyrëse të garazhit të shtetasit E. K., 39 vjeç, është vendosur dhe ka shpërthyer një sasi e dyshuar lënde plasëse.
Si pasojë janë shkaktuar dëme të konsiderueshme materiale në disa automjete, të parkuara.
Grupi hetimor ka administruar pamjet filmike nga vendngjarja dhe po vijon punën për identifikimin dhe kapjen e autorit, si dhe për dokumentimin e plotë të rrethanave të ngjarjes.
Kush është “Visi i makinave të shpejta”:
Ende nuk dihen shkaqet e ngjarjes, por Elvis Kosova është emër i njohur edhe më parë për policinë, dhe me precedent penal.
I njohur ndryshe si “Visi i garave”, apo “Visi i makinave të shpejta”, u arrestua në gusht të vitit të kaluar nga policia, pasi u akuzua për vjedhjen e një Audi R8 me vlerë rreth 200 mijë euro, por rezulton të jetë liruar disa ditë më vonë.
Së bashku me një turk kishte arritur të marrë përmes mashtrimit një automjet me vlerë 200 mijë euro.
Turku Yucehan Er kishte marrë një Audi me qira në Gjermani, ka ardhur në Shqipëri dhe ia ka dhënë Kosovës, i cili më pas ka bërë kallëzim në polici se ia kanë vjedhur.
Nga hetimet, automjeti rezultoi se ishte në duart e Kosovës, i cili e kishte çuar në shtëpinë e një 20-vjeçari në Prush, në periferi të Tiranës.
Aty, policia e gjeti në oborr të mbuluar me mushama dhe e sekuestroi.
Turku dhe Elvis Kosova u arrestuan, ndërsa 20-vjeçari u shpall në kërkim.
