Një tërmet i fortë me magnitudë 5.2 është regjistruar pasditen e sotme në provincën Malatya në Turqinë lindore.
Thellësia e tërmetit ishte 13.93 km, si pasojë e të cilit është ndjerë edhe në prefekturat fqinje.
Banorët e shqetësuar dolën të gjithë në rrugë, ndërsa media vendase kanë risjellë në vëmendje faktin se Malatya u prek rëndë dhe pësoi dëme serioze nga dy tërmetet e forta të një viti më parë.
Përkatësisht në datën 6 shkurt 2023, me magnitudë 7.7 dhe 7.6 ballë, me qendër në Kahramanmaras.
Ministri i Punëve të Brendshme Ali Jerlikaja deklaroi se janë angazhuar të gjitha ekipet e AFAD dhe institucioneve të tjera.
“Të gjitha ekipet e AFAD-it dhe institucioneve kompetente kanë nisur punën për skanimin e terrenit pas tërmetit 5.2 ballë në rrethin e Batalgazit, i cili është ndjerë edhe në krahinat përreth”, ka shkruar ai në platformën X (Twitter).
