Gati 250 mijë shqiptarë janë pajisur me dokumentacione të rregullta qëndrimi në një nga vendet e Bashkimit Europian pas pandemisë së Covid-19.
Të dhënat e Eurostat mbi emigracionin dhe lejet e qëndrimit që kanë dhënë shtetet anëtare të unionit rendisin shqiptarët në krye të listës së qytetarëve të huaj që janë pajisur me leje qëndrimi nga viti 2021 deri në vitin 2024.
Shifrat konfirmojnë valën e migrimit që shoqëroi rikthimin e lëvizjes së lirë, të bllokuar për gati 18 muaj për shkak të pandemisë.
Lexo edhe:
Ndërkohë, në total numri i shqiptarëve që janë larguar nga vendi përgjatë kësaj periudhe është edhe më i lartë për shkak se të dhënat e Eurostat nuk përfshijnë shqiptarët që kanë emigruar në vendet jashtë BE, si SHBA, Kanada, apo Britania e Madhe.
Eurostat thotë se në total, prej vitit 2008 janë mbi 1 milionë leje qëndrimi që kanë dhënë vendet e Bashkimit Europian për qytetarët shqiptarë, ose gati një e treta e popullsisë së vendit në vitin 1990, apo 40 për qind e popullsisë aktuale të Shqipërisë.
