Gati 1 vit më parë Grida Duma mori një vendim për karrierën e saj, që në atë kohë nuk u kuptua nga të gjithë, për ta lënë politikën mënjanë dhe për të nisur një aventurë të re në televizion, teksa prej dy sezonesh tashmë drejt “Top Story” në Top Channel, mjaft suksesshëm duhet thënë.
Megjithatë, këtë sezon, ka pësuar një ndryshim të vogël formati i programit që ajo drejton, teksa Gridën e shohim gjithmonë e më pak të ulur dhe më shumë duke moderuar në këmbë, mes të ftuarve dhe debatit, ndërsa ajo që ka tërhequr vëmendjen e shikuesëve është postura e saj, gati gjithnjë me dorën në xhep.
Ky qëndrim i Dumës është komentuar në rrjetet sociale, ndërsa mesa duket edhe ja përmendin shpesh edhe ndjekësit, teksa sot e ftuar në “Wake Up”, është pyetur pikërisht për arsyen pse ka zgjedhur këtë posturë, për të cilën edhe është kritikuar.
Lexo edhe:
Grida shpjegon se është një gjestikulacion, një tik më saktë, që ka zgjedhur ta bëjë për të krijuar një imazh të sajin. Duke qenë se këtë vit qëndron më shumë në këmbë, ish-poltikania thotë se kishte nevojë për një element të vetin mbështetës mendor, që i jep sportivitet në sjellje, ndërsa e përdor edhe për gjuhën e trupit.
“Besoj se në gjestikulacionin e kujtdo për të krijuar fizionominë e imazhit të vetë, secili ka nevojë për një tik. Pra dikush ka nevojë për një stilolaps, dikush ka nevojë të mbajë telefonin në dorë, dikush të mbajë një letër në dorë. Një njeri i cili duhet të rrijë, ju e shikoni që “Top Story” tani nuk zhvillohet më ulur, apo në tavolinë. Unë kam qenë pro kësaj sepse mendoj që gjuha e trupit flet e gjitha kur komunikon sidomos një politikan.
Politikani nuk bën show, flet vetëm me lirshmërinë që ka në gjestet e veta, me vetëbesimin që ka tek imazhi i vetë, qoftë edhe me stilin që ka, mënyrën si vishet dhe sa updated është ky që të prodhojë të ardhmen. Është e ardhmja? Pretendon që do të të japë të ardhmen? Po, në qoftë se ky një njeri në imazhin e vetë nuk e reflekton fare këtë, do të thotë që nuk lidhet me kohën.
Në këtë kuptim, në qoftë se unë e zhvilloj të gjithën “Top Story-n” në këmbë, secili ka nevojë për elementin e vetë mbështetës mendor që t’i japë një sportivitet në sjellje. Sepse po të jetë komplet statike, atëherë asnjë element nuk të ndihmon të rrish dy orë në atë pozicion. Duhet një tik i caktuar i cili të çlirojë ngarkesën dhe të komportohet mirë me veten. Unë nuk dua të bëj atë kthimin e përgjigjes që do të ishte shumë klishe, që ma thonë edhe miqtë e mi, të cilët më këshillojnë të them që jam duke futur dorën në xhepin tim, në fund të ditës”, – tha Grida.
