Me startin e edicionit të tretë të “Ferma VIP” këtë të premte, vëmendja nuk është vetëm te konkurrentët, por edhe te paneli i opinionistëve. Dy emra që po komentohen më shumë se kushdo tjetër janë Einxhel Shkira dhe Armina Mevlani, një dyshe që vjen me një histori të mëparshme jo fort të qetë.
Për të kuptuar pse kjo përballje në ekran pritet të jetë interesante, duhet të kthehemi pas në kohë dhe të kujtojmë raportet mes tyre.
Gjithçka nisi gjatë kohës kur Einxhel Shkira ishte një nga banoret më të forta dhe më të komentuara të “Big Brother VIP Albania 1”. Gjatë një puntate të emisionit “Goca dhe gra”, Armina Mevlani u shpreh hapur se nuk e preferonte aspak lojën e moderatores.
Lexo edhe:
“Këtë Einxhel po e heq se nuk më pëlqen fare. Për mua e fiton Iliri për artistin që është dhe kontributin e tij. Ai është shumë i suksesshëm, ia ka nisur nga zero dhe ka arritur të bëjë emër në një vend të huaj,” deklaroi Armina asokohe, duke treguar hapur mbështetjen për rivalin e Einxhelit.
Pasi përfundoi rrugëtimin e saj si finaliste në BBVA, Einxhel u ftua pikërisht në studion e “Goca dhe gra”. Ajo që ra në sy ishte mungesa e Arminës në panel atë ditë (për shkak të një arsyeje personale). E indinjuar nga deklaratat e mëparshme, Einxhel nuk e la situatën të kalonte pa një koment ironik, duke lënë të kuptohet qartë pakënaqësinë e saj.
“Zgjedhja më e mirë do ishte që ajo mos të ishte këtu kur unë të isha e ftuar. Besoj që nuk donte të më shihte me sy,” u shpreh ajo duke qeshur, por me një “thumb” mjaft të drejtpërdrejtë.
Nuk vonoi shumë dhe në puntatën tjetër Armina u pyet në lidhje me këtë reagim të Einxhelit. Ajo u shpreh e habitur se si kjo situatë u bë kaq e madhe, duke theksuar se thjesht kishte dhënë opinionin e saj si shikuese e formatit.
Armina sqaroi se, ndonëse kishin punuar bashkë më parë, mes tyre nuk ka pasur asnjëherë miqësi. Megjithatë, ajo theksoi se nga ana e saj nuk kishte asnjë inat të fshehur. “Thjesht nuk më ka pëlqyer te Big Brother-i. Ajo e ka marrë për keq sikur unë s’dua ta shoh me sy, por unë s’kam folur asnjëherë keq për të, sikur ajo për mua,” deklaroi Armina, duke u përpjekur t’i vendoste “kapakun” këtij debati në distancë.
Tani, rrugët e dy vajzave të njohura të ekranit kryqëzohen sërish, këtë herë me role të barabarta. Të dyja do të ulen krah njëra-tjetrës si opinioniste të formatit “Ferma VIP 3”.
Se si do të funksionojnë bashkë si kolege, duke pasur parasysh këtë të kaluar të tensionuar, mbetet për t’u parë.
