Në një vendim të prerë nga Gjykata e Kasacionit në Itali, çdo individ që kontrollon pa leje telefonin, WhatsApp-in apo çdo llogari tjetër digjitale të partnerit apo bashkëshortit konsiderohet të ketë kryer një krim penal, që mund të dënohet deri në 10 vjet burg.
Rasti konkret kishte të bënte me një burrë që, gjatë procesit të divorcit, kishte marrë dhe përdorur mesazhet e ish-bashkëshortes së tij pa pëlqimin e saj. Fillimisht ai u dënua nga Gjykata e Apelit në Messina, por apelimi në Gjykatën e Lartë italiane u rrëzua. Vendimi është tani përfundimtar dhe i pakthyeshëm.
Ky veprim është cilësuar si “akses i paautorizuar në një sistem informatik”, në bazë të nenit 615-ter të Kodit Penal Italian – një shkelje që trajtohet me seriozitet të lartë në legjislacionin e vendit.
Pra, edhe nëse ndiheni të dyshimtë, të lënduar apo të tradhtuar, ligji nuk ju jep të drejtë të spiunoni partnerin tuaj. Veprimi mund të sjellë pasoja të rënda ligjore, pavarësisht qëllimit apo kontekstit.
Ky vendim ka nxitur diskutime të shumta në Itali dhe jo vetëm, duke rikthyer vëmendjen te çështjet e privatësisë në marrëdhënie dhe kufijtë që nuk duhet të kapërcehen – as nga kurioziteti, dhe as nga xhelozia.
