E ftuar në emisionin Mirëmbrëma Yje me moderatoren Arbana Osmani, Jonida Maliqi ka ndarë publikisht detaje nga jeta e saj personale, duke u ndalur te marrëdhënia që sot ka me ish-partnerin e saj, Romeo Veshaj.
Artistja u shpreh se raporti mes tyre ka mbetur i qetë dhe korrekt edhe pas ndarjes, ndërsa periudhën që kanë kaluar bashkë e konsideron si një nga më të bukurat e jetës së saj. Në rrëfimin e saj, Maliqi theksoi se do të kishte dashur që një marrëdhënie e tillë e shëndetshme të ekzistonte edhe me babain e djalit të saj.
“Do kisha dashur që edhe me babin e Danit të kisha këtë raport që kam me Romeon sot e kësaj dite, me familjarët e tij. Më uron për çdo ditëlindje të Danit, timen, të mamit. Edhe unë e uroj atë dhe i jam shumë mirënjohëse se ka qenë një ndër partnerët e vetëm që ka bërë shumë për Danin.”
Lexo edhe:
Ajo foli edhe për lidhjen që ish-partneri kishte ndërtuar me djalin e saj, një raport që, sipas saj, ka mbetur i fortë në kujtesën e fëmijës edhe sot.
“Kanë qenë shumë të lidhur dhe Dani edhe sot e kësaj dite e përmend, nuk e ka harruar.”
Në rrëfim u përmend edhe një episod nga periudha e angazhimeve të saj jashtë vendit, kur, sipas këngëtares, ish-partneri është kujdesur për djalin e saj në mungesën e saj.
“Mbaj mend që unë fitova Eurovisionin dhe më duhej të lëvizja gjashtë muaj, dhe i thoshte mamit: ‘Bëje Danin gati se do ta nxjerr’, edhe e nxirrte në park lojërash me prindërit e tij. Gjë shumë e rrallë për mentalitetin shqiptar.”
