Fenomeni klimatik El Niño mund të shtyjë edhe afro 49 milionë njerëz të tjerë drejt pasigurisë akute ushqimore deri në fund të vitit të ardhshëm.
Alarmi vjen nga Programi Botëror i Ushqimit i Kombeve të Bashkuara, i cili paraalajmëron se bota po përballet me një nga episodet më të fuqishme të këtij fenomeni në dekada.
Sipas raportit, ekziston një probabilitet prej 81% që El Niño të jetë shumë i fortë. Temperaturat e sipërfaqes së Oqeanit Paqësor kanë arritur nivelet më të lartaa që nga viti 1982 dhe ky fenomen mund të jetë ndër më të fuqishmit që prej vitit 1950.
El Nino ndryshon modelet klimatike në mbarë globin, duke shkaktuar thatësira në disa rajone dhe reshje intensive apo përmbytje në të tjera.
Programi Botëror i Ushqimit vlerëson se, në 45 vendet më të ekspozuara ndaj këtij fenomeni, numri i njerëzve që vuajnë nga pasiguria akute ushqimore mund të arrijë në 274 milionë, një rritje prej 22% krahasuar me nivelet aktuale.
Afrika Jugore, Amerika e Jugut dhe Karaibet mund të kenë secila mbi 12 milionë persona shtesë që do të përballen me mungesë ushqimi.
Ndërkohë, parashikohen mungesë reshjesh në pjesë të Afrikës Lindore, rajonin e Sahelit, Amerikën Qendrore dhe Karaibe, ndërsa në Somali dhe zonat përreth rreziku i përmbytjeve pritet të shtohet.
Ekspertët e Programit Botëror të Ushqimit theksojnë se, megjithëse tregjet globale ushqimore nisën këtë periudhë në një gjendje relativisht të mirë falë korrjeve të vitit 2025, konfliktet dhe humbjet e mundshme në prodhimin bujqësor mund të çojnë në rritje të çmimeve, duke e bërë edhe më të vështirë sigurimin e ushqimit për familjet më të varfra.
Një tjetër shqetësim mbetet ulja e financimeve nga donatorët ndërkombëtarë, e cila ka kufizuar mbledhjen e të dhënave në terren dhe vlerësimin e ndikimit real të krizës.
Megjithatë, Programi Botëror i Ushqimit thekson se parashikimet mbeten të pasigurta dhe efektet e El Nino do të ndryshojnë nga një rajon në tjetrin.
Agjencia u bën thirrje qeverive dhe organizatave humanitare të përgatiten që tani, për të zbutur pasojat e një krize që mund të prekë miliona njerëz në mbarë botën.
