Cristiano Ronaldo nuk ka luajtur në ndeshjen në Premier League me Liverpool, mbrëmjen e djeshme, pas vdekjes së djalit të tij të porsalindur.
“Familja është më e rëndësishme se gjithçka dhe Ronaldo po mbështet njerëzit e tij të dashur në këtë kohë jashtëzakonisht të vështirë”, shkroi klubi në faqen e tij zyrtare.
“Ne të konfirmojmë se ai nuk do të luajë në ndeshjen kundër Liverpool në Anfield dhe ne nënvizojmë kërkesën e familjes për privatësi. Cristiano ne jemi me ty”, shtoi United.
Shokët e skuadrës së yllit portugez mbërritën në bazën stërvitore për tu përgatitur për ndeshjen, ndërsa u vu re se Ronaldo nuk ishte.
37-vjeçari njoftoi në tetor 2021 se ai dhe partnerja e tij Georgina Rodriguez do bëheshin prindër të binjakëve, një djali dhe një vajze.
Por mbrëmjen e së hënës, sulmuesi ndau me ndjekësit në Instagram lajmin tronditës ku zbuloi se vajza e tyre mbijetoi, por djali i porsalindur ndërroi jetë.
“Me pikëllimin tonë më të thellë duhet të njoftojmë se djali ynë ka ndërruar jetë. Është dhimbja më e madhe që çdo prind mund të ndiejë. Vetëm lindja e vajzës sonë na jep forcën për ta kaluar këtë moment me pak shpresë dhe lumturi. Të gjithë jemi të shkatërruar nga kjo humbje dhe me mirësi kërkojmë privatësi në këtë kohë shumë të vështirë. Djali ynë, ti je engjëlli ynë. Ne do të të duam gjithmonë”, shkroi ai.
