Një skemë tjetër kriminale me mikrokredi ka shpërthyer në Lezhë, por ndryshe nga herët e tjera, tani lind një dyshim edhe më i frikshëm: a po përdoren gratë e varfra si mjet për të gjeneruar kredi të rreme? A është përfshirë vetë institucioni i mikrokredisë në këtë skemë?
Të paktën 23 gra, të gjitha nga zona e Zejmenit në Lezhë, kanë zbuluar se janë futur në borxhe prej qindra mijëra lekësh – ndërkohë që asnjëra nuk ka aplikuar, nuk ka firmosur dhe nuk ka qenë e pranishme. Skema është zbuluar pas arrestimit të 33-vjeçares Donika Curri, e cila dyshohet se i ka mashtruar gratë duke iu premtuar ndihma bamirësie, ndërsa ka marrë dokumentet e tyre të identitetit dhe ka aplikuar për kredi në emër të tyre.
Lexo edhe:
Por në këtë rast, faji nuk mund të ndalet vetëm te mashtruesja. Pyetjet më të rënda bien mbi institucionin financiar IUTE Credit, që ka dhënë kredi pa pasur asnjë verifikim real, pa firmë fizike, pa nënshkrim noterial, madje as prezencën e aplikuesve.
Si është e mundur që një kompani e licencuar për kredi, të aprovojë pagesa deri në 500 mijë lekë vetëm mbi bazën e një fotoje të kartës së identitetit? A janë këto kredi të simuluara, të krijuara qëllimisht për të raportuar fitim, për të fryrë bilancet apo për të përfituar interesa mbi njerëz që nuk dinë as se janë futur në borxh?
Sistemi i mikrokredisë po shndërrohet në një rrjet grabitës me miratimin e heshtur të shtetit dhe institucionit mbikëqyrës. Nëse një kompani si IUTE mund të japë kredi pa firmë dhe pa prezencë fizike, atëherë kjo nuk është më papërgjegjshmëri. Kjo është bashkëpunim në mashtrim.
Nuk është hera e parë që qytetarët shqiptarë, të varfër, pa informacion dhe pa mbrojtje, kthehen në objekt manipulimi financiar. Por kjo skemë shënon një rënie të re të frikshme: shfrytëzimi i qëllimshëm i të varfërve për të ndërtuar borxhe që kthehen në para për institucionet e mikrokredisë.
Për më tepër, deri tani nuk ka asnjë reagim nga IUTE Credit. Asnjë sqarim. Asnjë shpjegim për mënyrën si janë lëshuar këto kredi. Asnjë verifikim i shpallur publikisht. Heshtja është komprometuese.
Nëse nuk ka firmë, nëse nuk ka aplikim të drejtpërdrejtë, nëse nuk ka vërtetim, atëherë nuk ka kredi. Ka mashtrim. Dhe ky mashtrim – nëse provohet se është i qëllimshëm – nuk është thjesht çështje individuale. Është një krim financiar i organizuar.
Autoritetet janë thirrur të hetojnë, por pyetja është: a kanë vullnet ta prekin “të fortin” e mikrokredisë? Apo do mbyllet si gjithmonë me ndonjë viktimë të thjeshtë dhe një sistem që vazhdon të godasë më të dobtët?
/Vip-Magazine.al/
