Moderatorja e dashur për publikun, Arbana Osmani, ka ndarë lajmin emocionues për një projekt të ri që po merr jetë në Tiranë. Përmes një postimi në rrjetet sociale, ajo zbuloi detaje nga prezantimi i “Grand Park Skyline,” një kompleks i ri rezidencial dhe hotelier që do të transformojë peizazhin urban të kryeqytetit.
Duke shpërndarë foto nga eventi, Arbana shkruan: “Pak ditë më parë, në prezantimin e projektit unik @grandparkskyline”, duke ngjallur kureshtjen e ndjekësve të saj për këtë destinacion të ri në zemër të Tiranës.
Grand Park Skyline është një kompleks modern i projektuar nga arkitekti zvicerian i famshëm, Valerio Olgiati, dhe përfshin dy kulla rezidenciale, një hotel luksoz me 5 yje dhe një qendër komerciale që do të mirëpresë markat më prestigjioze të modës. Me një sipërfaqe ndërtimi prej 145,000 m², ai do të ofrojë 530 apartamente moderne, 184 dhoma hoteli, si dhe një larmi shërbimesh si restorante, kafene, spa, palestër dhe mbi 800 vende parkimi nëntokësore.
Në ceremoninë e prezantimit, Ylli Ujka, administrator i kompanisë X-One, pjesë e Grupit IDA, shpjegoi vizionin për këtë projekt: “Grand Park Skyline synon të krijojë një oaz qetësie me pamje spektakolare mbi Parkun e Liqenit të Tiranës, duke i dhënë qytetit një destinacion të ri për turizmin dhe jetesën moderne.” Kompleksi do të ofrojë shërbime 24/7 dhe hapësira të shumta për aktivitete të ndryshme, duke u bërë një pikë referimi për qytetarët dhe turistët.
Projekti do të realizohet nga kompania X-One e Grupit IDA, një grup me përvojë të gjatë në ndërtimin e veprave ikonike në Itali dhe më gjerë. Grand Park Skyline pritet të kthehet në një simbol të ri të Tiranës moderne dhe një atraksion të veçantë për të gjithë.
