Aktori Elvis Pupa ka ironizuar vendimin e qeverisë për financimin e koncertit të Kanye West, përmes një postimi në rrjetet sociale.
Duke iu referuar fondit prej 4 milionë dollarësh, Pupa ka ironizuar debatet për përdorimin e parave publike, duke sjellë në vëmendje kostot e larta të ndërtimit të rrugëve në Shqipëri.
“4 milionë dollarë ka shpenzuar qeveria për të organizuar koncertin e ish-burrit të Kim Kardashianit. E përse mërziteni ju? Se gjoja këto lekë mund të ishin shpenzuar më mirë në shkolla, në spitale ose për të bërë rrugë”, shprehet ai.
Lexo edhe:
Më tej, aktori vijoi me ironi duke iu referuar kostos së ndërtimit të rrugëve, që siç thotë edhe ai, kushtojnë miliona dollarë vetëm 1 km.
“A e dini ju sa shkon 1 kilometër rrugë në Shqipëri? Edhe 15 milionë dollarë shkon. Kështu që me 4 milionë bëhen 300 metra rrugë. A kanë për të na shpëtuar jetën ato, si t’i kishim, si të mos i kishim?”, shprehet Pupa.
Në fund të postimit, ai vijoi ironinë duke u ndalur te vetë artisti dhe koncerti i tij.
“Por e rëndësishmja është që koncerti të dalë bukur, sepse Kanye-ja i ka dhe tekstet shumë emancipuese”, përfundon aktori.
