Kiara Tito dhe balanca me tre rolet e saj, nënë, aktore dhe moderatore
Të jesh prind në ditët e sotme nuk është e lehtë. Një mision i pakohë që kërkon përkushtim dhe ka një lloj tjetër vështirësie në përpjekje për të kapur ritmin e jetës që ecën me vrull.
Nëse do flisnim për një brez të prindërve tanë, shumë prej tyre flasin për një tjetër lloj vështirësie, atë të një ekonomie të pamundur dhe mungesës së një pune, veçanërisht për nënat shtëpiake.
Sot ritmi i jetës ka rimodeluar edhe misionin e nënave, që në përpjekje për të punuar sa më shumë për rritjen e fëmijëve, vuajnë anën tjetër të medaljes, atë të mosprezencës persistente në rritjen e fëmijëve.
E njëjta gjë vlen edhe për personazhet e njohur si Kiara Tito, e cila mes angazhimeve të mëdha profesionale si aktore dhe moderatore, rrëfeu sot në Wake Up ndjenjën e fajit si nënë dhe mungesën e vajzës së saj Luna.
“Nuk e kisha menduar që filmi ka kaq shumë lodhje. Jam e angazhuar dhe te Portokallia. Mes këtyre të dyjave nuk kam asnjë ditë pushim. Gjëja që më mërzit është pjesa që nuk takoj shumë shpesh Lunën këto ditë. Por e kam lënë në duar të sigurta. Më mungon shumë dhe herë pas here më kap ajo ndjesia e fajit”, tha Kiara Tito./Vip Magazine
