Ish-menaxheri i këngëtarit të njohur Gjesti, Samed Potera, i ftuar në studion e ‘Kosova Today’ në ekranin e Klan Kosova, ka konfirmuar se ka ngritur një padi ndaj tij për “shpifje dhe prishje imazhi”.
“Padinë e kam bërë sot për shkak të akuzës për shpifje dhe prishje imazhi,” deklaroi Potera gjatë një interviste televizive, duke theksuar se është i gatshëm të përballet me këtë çështje ligjërisht.
I pyetur nga gazetari Gjergj Prenga për arsyen se pse Gjesti zgjodhi të rikthente në vëmendje një çështje të konsideruar të mbyllur, Potera u shpreh se këngëtari mund të jetë ndikuar nga faktorë të jashtëm. “Ky i fundit mund të ketë qenë nën presion,” tha ai.
Ish-menaxheri hodhi poshtë gjithashtu rrëfimin e Gjestit në lidhje me jetën e tij personale brenda formatit Big Brother VIP Kosova 3, duke e cilësuar si të pavërtetë. Sipas Poterës, deklaratat e këngëtarit lidhur me familjen e tij nuk qëndrojnë.
Për të mbështetur pretendimet e tij, Potera publikoi incizime nga bisedat e tij me Gjestin, ku ky i fundit shprehej: “Nuk m’ke borxh.” Këto prova, sipas ish-menaxherit, janë një dëshmi e qartë që rrëzojnë akuzat e ngritura ndaj tij.
Procesi mes dy ish-bashkëpunëtorëve ka tërhequr vëmendje të madhe në publik, duke shënuar një tjetër skandal mes figurave të njohura të showbiz-it shqiptar.
