Për herë të parë në historinë e përballjeve ushtarake, Irani ka përdorur raketën me rreze të mesme veprimi “Sajjil” në një kontekst real luftimi, duke shënuar një tjetër kapitull të tensionuar në përplasjen me Izraelin.
Lajmi u konfirmua nga Garda Revolucionare Islamike përmes agjencisë “Tasnim”, ndërsa operacioni masiv “Premtimi i Vërtetë 3” vijon të lë pas shpërthime dhe panik në territoret e pushtuara.
Operacioni i koduar “O Ali Ibn Abi Talib”, i drejtuar nga forcat ajrore të IRGC, solli një breshëri raketash balistike dhe dronësh kundër qendrave strategjike izraelite në Tel Aviv, Haifa dhe rajonet veriore – duke sfiduar seriozisht sistemin mbrojtës të njohur si “Mburoja e Hekurt”.
Lexo edhe:
Mes arsenalit të përdorur, spikasnin armët më të avancuara balistike të Teheranit:
Raketa “Emad” – me rreze 2,000 km dhe me aftësi precize drejtimi deri në impakt, u përdor për të goditur me saktësi objektivat në Haifa.
Raketa “Qadr” – në variante që variojnë nga 1,350 deri në 1,950 km, e pajisur me sistem drejtimi inercial dhe karburant të lëngshëm.
Raketa “Kheibarshekan” – më e reja në arsenalin iranian, me kokë trikonike dhe aftësi për të shmangur sistemet si “David’s Sling” dhe “Patriot”, falë manovrimit të lartë gjatë zbritjes në atmosferë.
Por momenti më i rëndësishëm ishte aktivizimi për herë të parë i raketës me karburant të ngurtë “Sajjil”, e cila ka rreze veprimi mbi 2,000 kilometra dhe është dizenjuar për të shmangur përgjimet radarike dhe për të penetruar në thellësi të territorit armik me shpejtësi të madhe.
Sipas mediave izraelite, shpërthime masive janë regjistruar në qendrat energjetike dhe infrastrukturën ushtarake në Haifa dhe afër Tel Avivit, duke lënë të vrarë të paktën një person dhe dhjetëra të plagosur.
Fotot nga vendngjarja tregojnë zjarr të përhapur në rafineritë e naftës dhe ndërtesa të shkatërruara, ndërsa ushtria izraelite ka pranuar se shumë nga raketat kanë shpëtuar sistemit mbrojtës ajror.
Në të njëjtën kohë, mbrojtja ajrore iraniane raporton se ka neutralizuar dhjetëra dronë dhe raketa kundërsulmuese të ushtrisë izraelite, përfshirë tre raketa lundrimi dhe dhjetë dronë që tentonin të depërtonin në brendësi të territorit iranian.
Autoritetet iraniane kanë lëshuar paralajmërime të qarta: çdo vazhdim i agresionit izraelit do të përballet me sulme edhe më të gjera dhe më të ashpra. “Premtimi i Vërtetë 3” tashmë po shihet si një provë e qartë e fuqisë balistike të Teheranit dhe një mesazh i drejtpërdrejtë ndaj çdo përpjekjeje për të sfiduar sigurinë e Republikës Islamike.
