Një ngjarje e rëndë ka ndodhur sot pasdite në Tiranë, ku 35-vjeçari Bledi Hasani ka humbur jetën brenda poligonit të qitjes “Action Target” në pronësi të biznesmenit Emiljano Dusha , në rrugën “Dervish Hima”.
Sipas policisë, ai dyshohet se është vetëvrarë me armën që po përdorte gjatë qitjes.
Në njoftimin zyrtar, Policia e Shtetit bën me dije se:
“Rreth orës 13:30, brenda një poligoni në rrugën ‘Dervish Hima’, dyshohet se është vetëvrarë me armën e zjarrit me të cilën po kryente qitje, shtetasi B. H., 35 vjeç. Shërbimet e Policisë ndodhen në vendngjarje dhe, në bashkëpunim me grupin hetimor, po punojnë për sqarimin e rrethanave dhe dokumentimin e plotë të rastit.”
Poligoni në pronësi të Emiljano Dushës
Skyweb.al mëson se poligoni “Action Target”, ku ndodhi ngjarja, është në pronësi të biznesmenit Emiljano Dusha, i cili njihet sëfundmi si ortak i shtetit në industrinë e prodhimit të municioneve dhe uniformave ushtarake.
Dusha është pronar i kompanisë MSSC, që zotëron 49 për qind të aksioneve të Guna Tactical, ndërsa 51 për qind zotërohet nga ndërmarrja shtetërore KAYO sh.a., e themeluar për zhvillimin e projekteve të mbrojtjes dhe sigurisë.
Ky partneritet publik-privat është bërë objekt debatesh për mënyrën e përzgjedhjes së MSSC-së si ortak i shtetit dhe për mungesën e transparencës në procesin e krijimit të kompanisë.
