Një studim i fundit nga “London School of Hygiene & Tropical Medicine” dhe “University of York” ka tronditur opinionin publik, duke paralajmëruar se përdorimi i cigareve elektronike nga të rinjtë mund të kthehet në “portën hyrëse” drejt duhanpirjes tradicionale.
Rishikimi i 56 studimeve të kryera nga viti 2016 deri në 2024 zbulon se të rinjtë që pijnë “vape” kanë tre herë më shumë mundësi të nisin duhanin klasik krahasuar me bashkëmoshatarët e tyre që nuk përdorin cigare elektronike.
Ekspertët theksojnë se rreziku nuk ndalet vetëm tek duhani. Studimi nxjerr në pah se “vape”-i lidhet gjithashtu me:
-probleme të frymëmarrjes si astma dhe kollë të vazhdueshme,
-konsum më të lartë të alkoolit dhe kanabisit,
-përkeqësim të shëndetit mendor,
-raste të dëmtimeve nga shpërthime apo defekte të pajisjeve elektronike.
Shkencëtarët paralajmërojnë se këto gjetje janë të qëndrueshme në nivel ndërkombëtar, duke treguar se fenomeni është i përhapur dhe nuk kufizohet vetëm në një vend apo kulturë të caktuar.
Ky raport vjen në një kohë kur përdorimi i cigareve elektronike mes të rinjve është në rritje shqetësuese, duke ngritur pikëpyetje mbi politikat shëndetësore dhe masat parandaluese që duhen marrë urgjentisht.
Për më shumë informacion, mund të lexoni artikullin e plotë në LSHTM.
