Një ngjarje që ngjan me një film horror dhe me detaje ende të paqarta. Ky është përshkrimi që del nga hetimet që po zhvillohen mbi sulmin me thikë ndaj kryebashkiakes së qytetit Herdecke, Iris Stalzer, në landin e Nordrhein-Westfalenit në Gjermani.
Në orët para thirrjes për ndihmë dhe mbërritjes së ambulancës, 57-vjeçarja dyshohet se është torturuar për orë të tëra në bodrumin e shtëpisë së saj nga vajza e adoptuar, 17-vjeçare.
Rindërtimi i ngjarjes nga policia është konfirmuar nga dëshmia e vetë viktimës, e cila ka rifituar vetëdijen dhe ka akuzuar vajzën.
Sipas burimeve të policisë të cituara nga gazeta Bild, vajza e adoptuar e ka sulmuar nënën në bodrum duke tentuar t’i djegë flokët me spraj dhe çakmak, dhe e ka goditur disa herë me dy thika.
Lexo edhe:
Mbi trembëdhjetë goditje me thikë janë konstatuar në trupin dhe barkun e gruas. Gjithashtu, dëmtimet në kafkë tregojnë se koka e saj është përplasur me një objekt.
Vajza dyshohet se ka vepruar për hakmarrje. Më pas, duket se është penduar, siç tregon përpjekja për të pastruar gjakun, dhe telefonata për ndihmë në orën 12:40.
Në thirrjen për ndihmë, vajza kishte deklaruar se nëna e saj, para se të humbiste ndjenjat, kishte thënë se ishte sulmuar nga një grup personash. Ky pretendim shkaktoi alarm në gjithë Gjermaninë, për shkak të zgjedhjeve të fundit në land dhe tensionit politik pas humbjes së ekstremit të djathtë në balotazh.
Megjithatë, nëse ka qenë hakmarrje, ka qenë një hakmarrje personale. Në shtëpinë e Iris Stalzer kishte pasur më parë një konflikt të dhunshëm. Verën e kaluar, një debat i ashpër kishte përfunduar me vajzën e adoptuar duke kërcënuar me thikë.
Aktualisht, akuzat ndaj vajzës janë për lëndime të rënda trupore dhe jo për tentativë vrasjeje.
Sipas prokurorit të përgjithshëm Bernd Halldorn, thirrja për ndihmë mund të interpretohet si një shenjë pendese.
Vajza ndodhet aktualisht në një spital psikiatrik nën mbikëqyrjen e policisë, ndërsa vëllai i saj 15-vjeçar është ende nën hetim dhe nën kujdesin e shërbimeve sociale.
