Instituti i Shëndetit Publik (ISHP), me mbështetjen e UNICEF, janë duke zhvilluar një fushatë mbarëkombëtare për ndërgjegjësimin e prindërve te vaksinimit në kohë të fëmjëve ndaj Fruthit, Shytave dhe Rubeolës (FRP) me dy doza 1 dhe 5 vjeç.
Vaksinimi është një e drejtë themelore e fëmijëve, dhe si e tillë, prindërit kanë përgjegjësinë ta realizojnë atë në kohë ndërsa institucionet e sistemit të kujdesit shëndetësor kanë detyrimin t’ua ofrojnë dhe të krijojnë kushtet që ky shërbim të ofrohet kudo dhe të jetë i sigurt, pavarësisht kushteve social-ekonomike dhe vendbanimit të tyre.
Vaksinimi ndaj FRP mbron fëmijën tuaj nga tre sëmundje ngjitëse – fruthi, shytat dhe rubeola – të cilat mund të çojnë në komplikacione shëndetësore madje edhe humbje jete nëse nuk trajtohen ne kohe. Me mbështetjen e UNICEF-it, ISHP synon të rrisë ndërgjegjësimin për vaksinimin ndaj FRP në kohë dhe sipas Kalendarit Kombëtar të Vaksinimit.
Lexo edhe:
Kjo fushatë është një iniciativë për të ndërgjegjësuar marrjen e vaksinave të fruthit, shytave dhe rubeolës (FRP) tek fëmijët në mbarë vendin dhe ka në fokus rritjen e ndërgjegjësimit të publikut për rëndësinë e vaksinimit ne kohe ndaj FRP.
Fushata nisi në 2 Dhjetor 2024 me një video ndërgjegjësuese të transmetuar në media dhe rrjete sociale, duke nënvizuar rëndësinë që ka aplikimi në kohë i të dy dozave të kësaj vaksine në mbrojtjen e shëndetit të fëmijëve dhe po pasohet nga materiale të tjera multimediale, të cilat do të adresojnë jo vetëm rëndësinë e marrjes së informacionit rreth vaksinës FRP në burime të besuara por edhe keqinformatat që ekzistojnë rreth saj.
Kjo fushatë përfshin një sërë kanalesh dhe formatesh multimediale, si radio, ekrane digjitale, fletëpalosje dhe postime në mediat sociale, duke përfshirë zëra të rëndësishëm në fushën e shëndetit publik. Fushata po mbështetet dhe nga një sërë aktorësh kyç, duke përfshirë autoritetet lokale, UNICEF në Shqipëri, mjekë, psikologë dhe figura publike.
Përse fushata kundër Fruthit, Rubeolës dhe Shytave?
Kjo fushatë vjen pas një shpërthimi të ri të fruthit në fillim të vitit 2024, ku u prekën kryesisht fëmijët në qytetet e Tiranës dhe Durrësit, zona në të cilat ka patur dhe një rënie në shifrat e vaksinimit të fëmijëve.
Megjithëse mbulesa vaksinale me doza është e lartë, sipas raportimeve të shifrave të vaksinimit nga ISHP, ka ende një numër të lartë fëmijësh te pavaksinuar ndaj FRP.
Një dozë e vetme e vaksinës ndaj FRP është afërsisht 95% efektive kundër fruthit, 78% efektive kundër parotitit (shytave), dhe 99% efektive kundër rubeolës. Pas një doze të dytë vaksine ndaj FRP, mbrojtja rritet në 99% kundër fruthit dhe 88% kundër parotitit (shytave).
Fëmijët që marrin të dy dozat e vaksinës ndaj FRP konsiderohen të mbrojtur për gjithë jetën.
‘Fëmijët të cilët nuk janë të vaksinuar, jo vetëm që rrezikojnë jetën e tyre, por dhe të fëmijëve të tjerë të cilët nuk mund të aplikojnë këtë vaksinë për shkak të problemeve të imunitetit.’, shprehet Rovena Daja, përgjegjëse e programit të vaksinimit në ISHP.
Kujtojmë se fruthi, rubeola dhe shytat janë sëmundje të parandalueshme, por ato mbeten një kërcënim i rëndësishëm për çdo person e veçanërisht për fëmijët. Vetëm fruthi mund të çojë në komplikime të rënda si pneumonia, encefalit, dëmtim te syve, madje edhe vdekje. Shytat mund të shkaktojnë probleme afatgjata shëndetësore si meningjiti, dhe kur ndodhin në moshën më të rritur mund të çojë në sterilitet, ndërsa rubeola, edhe pse më e lehtë, paraqet rreziqe të rënda për gratë shtatzëna dhe fëmijët e tyre të palindur, duke çuar në defekte të lindjes dhe humbje të degjimit.
Inkurajojmë prindërit të marrin pjesë në këtë fushatë ndërgjegjësimi duke u siguruar që fëmijët e tyre të kenë aplikuar të dy dozat e vaksinës ndaj Fruthit, Rubeolës dhe Shytave në kohë.
Për çdo paqartësi apo pyetje, pyesni mjekun tuaj, drejtohuni pranë qendrës më të afërt shëndetësore, ose ndiqni fushatën në kanalet zyrtare të ISHP dhe UNICEF.
#vaksinonidukebesuar
