Festivali i Birrës në Korçë organizuar nga Bashkia do të mbahet me datat 18-22 gusht, ku përveç emrave shqiptarë do ketë edhe nga ata të huaj. Mirëpo, pjesëmarrja e këngëtarit serb Goran Bregoviç ka sjellë reagime të shumta në Shqipëri dhe Kosovë si dhe ka bërë që shumë prej artistëve të ftuar të tërhiqeshin.
Këngëtarët që nuk do të jenë pjesë janë: Dafina Zeqiri, Capital T, grupin “NA’ dhe Dren Abazi. I vetmi këngëtar nga Kosova që do jetë pjesmarrës do jetë këngëtari Shemsi Krasniqi nga grupi “Ilirët”.
Nënkryetarja e Bashkisë së Korçës, Bunila Themeli ka folur për artistët të cilët u tërhoqën nga pjesëmarrja. “Artistë nga Kosova janë tërhequr nga pjesëmarrja e tyre. Kishim Dafina Zeqirin, Capital T, grupin “NA”, por që u tërhoqën. Edhe Dren Abazi, por ai për arsyet e tij personale. Kemi Shemin nga “Ilirët”, pasi ai është i vetmi nga Kosova i cili do të performojë në Festën e Birrës, do të thotë vetëm këta emra kishim nga Kosova, por që vetëm Shemi ka pranuar. Ndërsa do ketë një bandë nga brazili, një greke si dhe emra të tjerë shqiptarë”.
Bregoviç nuk do të këndojë falas për popullin shqiptar më 22 gusht. Bileta për ta parë atë do të jetë 10 mijë lekë të vjetra (ose një mijë lekë të reja). Pozicioni për këtë çmim është në largësi të skenës ndërsa afër saj nuk dihet ende sa mund të jetë çmimi.
Ardhja e Bregoviç-it në Shqipëri është kundërshtuar nga pjesa më e madhe e artistëve dhe personave publik e të thjeshtë pasi mendojnë që arti po ‘përzihet’ me politikë, por Bashkia e Korçës është shprehur se tashmë kontratat janë mbyllur të gjitha. Goran Bregoviç do të këndojë para shqiptarëve në natën e fundit të këtij eventi.
