Na është thënë që prej fillimit të kësaj pandemie se po luftojmë me një armik të panjohur, me një armik të pamërshishëm, me një armik fantazëm që vetëm emrin mësuam se e kish Covid. Por nuk di të them nëse shqiptarëve ju desh të luftonin këtë farë covidi apo pangopjen e këtij sistemi që edhe më të dukshme i janë bërë jargët nëpër dhëmbë ndërkohë që pret të kafshojë prenë e vet.
E me gjithë poteret e mëdha të skandaleve të kohëve të fundit, sot nuk mendoj se është momenti të përmendim ata që bënë shumë pak ose asgjë për këtë popull të dorëzuar në duart e pushtetit gjakpirës.
As në panelet e studiove televizive nuk duhet të jenë më ata që dukshëm nuk qenë veçse disa aktorë që dolën e luajtën shfaqjen e rradhës.
Sot nuk mendoj se duhen përmendur e lavdëruar më këta demek heronj që na qenkan endur korridoreve te spitaleve të përkushtuar e të palodhur sepse e dimë mjaft mirë që në ato korridore vrapohet vetëm pas valles së lekut që hidhet e dirdhet nga shqiptarët e pashpresë të cilët nuk kanë armë të tjera për të qëndruar e luftuar. Dhe ndërsa të gjithë jemi në dijeni të këtyre pazareve, duket se zgjidhja është heshtja dhe 2 xhepat plot të jenë gati se s’kemi ç’bëjmë, dhe me pak fat, për tu habitur në fakt sesi qëndrojnë akoma të ndershëm, dashtë Perendia e na qëllon ndonjëri nga këta të paprekurit nga virusi i lekut.
Le të provojmë të falenderojmë sot të gjithë mjekët e secilës familje shqiptare që nuk janë dhe aq të famshëm sa ata “të mëdhenjtë”.
Sot qeveria duhet të duartrokasë e shpërblejë ata që vërtetë bënë detyrën. Sot shqiptarët duhet tu besojnë vetëm atyre që pushteti nuk i do sepse ata na duan ne.
Televizionet të mos merren me Tiret, por të rrëmojnë edhe pak nëpër urgjencat e vogla ku janë të vendosur mjekët e familjeve shqiptare. Ndoshta do të mund të dëgjojnë edhe për Doktoreshë Mirela Dhamo të urgjencës nr.4 të Tiranës.
Mjeke që nuk u lodh në asnjë çast duke shpjeguar çfarë duhej e jo. Nuk vonoi asnjëherë të hapë telefonin për t’ju përgjigjur njëmijë pyetjeve që mund të ja kishim bërë kushedi edhe sa herë të tjera më parë. Nuk hezitoi për asnjë moment të përgjigjet edhe në 3 apo 4 të mëngjesit kur gjindeshim krejt të pashpresë e të dorëzuar. E nuk kurseu as kohën e saj për të të mbeshtetur psikologjikisht e për të dhënë kurajo. Zero lekë çmimi i kësaj doktoreshe dhe sigurisht as nuk do të ftohet nga ndonjë parti politike për tu kandiduar për deputete.
Doktoreshë Mirela dhe shumë të tjerë si ajo janë mjekësia që i takon këtij populli. Këto mjekë që nuk hoqën dorë nga ne, duhet ti përkasin pikërisht asaj listës së heronjve që njihen e falenderohen në rrjetet sociale nga Zoti Rama e Zonja Manastirliu sepse atëherë kur njeriu humbka shpresat tek vendi i tij, qenkan këto figura që të kthejnë nga vdekja e të shpëtojnë dhe shpresën.
