Ish-zv.kryeministri Erion Braçe ka reaguar ashpër ndaj shitjes dhe reklamimit të cigareve elektronike në Shqipëri, duke akuzuar kompanitë e mëdha, mes tyre edhe IQOS, për shkelje flagrante të ligjit dhe për përfshirje në një “krim ndaj fëmijëve”.
Në një postim të fortë në rrjetet sociale, Braçe ka ngritur shqetësimin për mënyrën se si këto produkte shiten lirshëm në qendër të Tiranës dhe në disa prej supermarketeve të mëdha të kryeqytetit, pa asnjë paralajmërim ligjor për ndalimin e shitjes ndaj të miturve.
“IQOS shkel brutalisht ligjin; reklama të vape-cigareve elektronike, të paligjshme që joshin fëmijët!
Asnjë pengesë, asnjë njoftim për ndalimin ndaj fëmijëve deri në 18 vjeç! Lexoni çfarë po i bën fëmijëve cigarja elektronike e IQOS dhe të tjerëve!”, shkruan Braçe.
Sipas tij, ligji shqiptar parashikon qartë që shitja e produkteve të duhanit, përfshirë edhe cigaret elektronike, duhet të shoqërohet me paralajmërime të dukshme dhe ndalime për të miturit. Por në terren, thekson Braçe, asnjë nga këto rregulla nuk po zbatohet.
“Shihni sa hapur, lirshëm dhe pa asnjë ndalim të detyruar nga ligji shesin duhanin dhe cigaret elektronike! Zero lajmërim, në shkelje të hapur të ligjit dhe duke lehtësuar shitjen ndaj fëmijëve. Ky është krim!”, shkruan ai më tej.
Sky News: cigaret elektronike lidhen me dëme serioze shëndetësore
Në postimin e tij, Braçe ka përfshirë edhe një artikull të “Sky News” në Britani, që paralajmëron për pasojat e rënda që cigaret elektronike po shkaktojnë tek të rinjtë.
Sipas një studimi të përbashkët nga “Universiteti i York-ut” dhe “Shkolla e Higjienës dhe Mjekësisë Tropikale në Londër”, përdorimi i cigareve elektronike lidhet me:
-Rritje të rrezikut për pneumoni, bronkit dhe astmë;
-Ulje të numrit të spermatozoideve, dhimbje koke dhe migrenë;
-Si dhe rritje të mundësisë për depresion dhe mendime vetëvrasëse.
Studimi, që përfshin 56 rishikime dhe mbi 384 analiza shkencore, tregon gjithashtu se fëmijët që përdorin cigare elektronike kanë “tre herë më shumë gjasa” të bëhen duhanpirës në të ardhmen.
Braçe kërkon që autoritetet shqiptare të ndërhyjnë menjëherë për të zbatuar ligjin dhe për të ndaluar shitjen dhe reklamimin e këtyre produkteve ndaj të miturve, duke e cilësuar këtë situatë “një krim të hapur që po ndodh në dritë të diellit”.
Megjithatë, ajo çfarë është për tu shqetësuar është mosreagimi i institucioneve.
