Me një njoftim të thatë për “shtetasin H.N.”, Policia e Shtetit njoftoi për vdekjen nga rrethana natyrore të dervishit të Teqesë së Alipostivanit në Përmet, Baba Hekuran Nikollari. Njoftimi policor nxitoi të informonte që shtetasi nuk kishte shenja dhune, por do të bëhej ekspertiza mjeko-ligjore.
Baba Hekuran Nikollari tregohet si i vetmi baba ndër bektashinjtë e gjallë, që pas vdekjes së Kryegjyshit Baba Reshat Bardhit, gëzonte një reputacion të veçantë në gjithë jugun e Shqipërisë për përkushtimin e tij ndaj bektashizmit. Reputacion që nuk e gëzon Baba Mondi, Kryegjyshi i zgjedhur pa votim nga komuniteti bektashi.
Baba Nikollari ndërtoi nga zero Teqenë e Baba Aliut në Alipostivan, duke e bërë së fundi një vend pelegrinazhi të famshëm dhe me shumë vizitorë. Po kështu, Nikollari ndërtoi Teqenë e Frashërit, Teqenë e Përmetit dhe disa teqe të tjera në jug të Shqipërisë, si askush tjetër në komunitetin bektashi.
Të gjithë dervishët dhe besimtarët tregonin për Baba Nikollarin se ishte i veçantë i Zotit dhe që kishte pasur një ndriçim hyjnor para se të fillonte rrugëtimin e tij në ndërtimin e teqeve në Jug, derisa u bë baba i respektuar nga gjithë komunitetet fetare në Jug.
Rrugëtimi u ndërpre mbrëmjen e ditës së diel, pa asnjë shkak të ditur mjekësor. Policia është njoftuar nga ndihmësit e teqesë se Baba Hekurani nuk po lëvizte më.
Çfarë ndodh pas ikjes së një “babai” bektashi? Emërohet një dervish tjetër nga Kryegjyshi, i cili merr në dorëzim të gjitha teqetë e Jugut që mbante me përkujdesje babai që ndërroi jetë. Teqetë dhe të ardhurat e aktivitetit të tyre shërbenin për zgjerimin e tyre apo ngritjen e teqeve të tjera.
Tani që shteti “Bektashi” është në horizont, paratë dhe teqetë e Jugut nevojiten për një tjetër aktivitet: krijimin e “Bektashi Land”, pa dogana dhe polici, por me arka parash dhe pasaporta të “arta”. A do të ishte dakord Baba Hekuran Nikollari, me reputacion absolut në komunitet, kur të mblidheshin baballarët në Kryegjyshatë e të shndërronin bektashizmin në “shtet”?!
