Teksa një pjesë e madhe e kontinentit europian po përballet me temperatura të larta tej normales, pjesë të tjera janë prekur nga stuhi të shoqëruara me reshje të dendura shiu, mes tyre edhe Zvicra.
Shteti helvetik është goditur nga reshje të forta shiu, të cilat kanë shkaktuar edhe rrëshqitje dheu në jugperëndim të vendit, duke rezultuar me zhdukjen e tre personave/
Shërbimet e urgjencës me helikopterë, dronë dhe qen shpëtimi kërkuan të shtunën për tre personat e zhdukur
MeteoSchëeiz, zyra e qeverisë për motin dhe klimën, tha se 124 mm shi ra në luginën Mesolcina në kantonin Grisons të premten, me 63 mm që ranë vetëm në një orë.
“Nuk ishte niveli i shiut, por përqendrimi i shiut në një periudhë kaq të shkurtër kohore që shkaktoi problemet,” tha një zëdhënës i MeteoSchëeiz. “Ky përqendrim i shiut ndodh vetëm një herë në 30 vjet”, theksoi ai.
Disa lumenj dolën nga shtretërit e tyre në luginën e Mesolcinës, e njohur gjithashtu si Misox, duke mbuluar rrugë, fusha dhe fshatra me rrënoja dhe mbetje.
Tre shtëpi dhe tre makina u rrëmbyen nga uji në fshatin Sorte, tha policia e Grisons. Dy oficerë policie kanë mundur të ikin nga automjeti i tyre i cili ishte zhytur deri në çati.
Katër persona u raportuan fillimisht të zhdukur, megjithëse një grua u gjet më vonë nën rrënoja dhe u dërgua në spital në Lugano. Një kërkim ishte ende duke u zhvilluar për tre persona të tjerë që policia tha se mund të kishin qenë në shtëpitë e tyre kur ndodhi përmbytja.
Policia u bëri thirrje njerëzve të mos udhëtojnë në rajon pasi shumë rrugë janë mbyllur, ndërsa pesë fshatra kanë mbetur pa energji elektrike.
