Një ditë pas ndarjes së saj nga jeta kryeministri Edi Rama ka bërë një dedikim prekës për të ëmën Aneta Rama.
Teksa e shoqëron me një foto të tij në fëmijëri ku shfaqet bashkë me nënën e tij, kreu i qeverisë si asnjëherë tjetër shkruan disa vargje prekëse dedikuar asaj që ai e quan ylli i shtëpisë.
Rama falënderon të gjithë ata që përmes mesazheve të panumërta i janë gjendur pranë në këtë ditë të vështirë, duke i bërë apel të kujtojnë nënat që nuk i kanë më ose të gëzojnë praninë e saj.
Lexo edhe:
**Më poshtë shkrimi i plotë nga kryeministri Edi Rama
Mund të derdhësh lot pse iku
Ose mund të buzëqeshësh sepse jetoi
Mund të mbyllësh sytë e të lutesh që të kthehet
Ose mund t’i hapësh e të shohësh gjithçka të ka lënë
Zemra jote mund të jetë bosh sepse nuk e sheh dot më
Ose ti mund të jesh plot me dashurinë që ndave me të
Mund t’ia kthesh shpinën të nesërmes dhe jetosh në të djeshmen
Ose mund të jesh i gëzuar me të nesërmen për çka ishte e djeshmja me të
Mund ta kujtosh atë vetëm për ikjen e saj
Ose mund të kujdesesh për kujtimin e saj që ajo të jetojë në të
Mund të qash e të mbyllesh në vete, bosh e me kurriz nga bota
Ose mund të bësh atë që nëna do të donte: Të hapësh sytë, të qeshësh, të duash dhe të ecësh përpara
***Edhe në emër familjes sonë lejomëni t’ju falenderoj përulësisht, për praninë tuaj të paçmueshme përmes mesazheve të pafundme e luleve të panumërta, që disi e lehtësuan peshën ndrydhëse të boshllëkut tonë të pangushëllueshëm.
Duke ju kërkuar një ndjesë të thellë për të qenit i pamundur t’ju përgjigjem, ju uroj me shpirt të gjithë atyre që jetojnë me këtë boshllëk, të rrojnë sa më gjatë që ta kujtojnë nënën e tyre dhe të tjerëve që kanë fatin ta kenë pranë yllin e shtëpisë, t’i kenë nënat sa malet dhe t’i gëzohen sa më shumë dritës së tyre, të pakonkurueshme as nga dielli e nga vetë yjet e qiellit.
Aneta Rama mbylli sytë një ditë më parë në moshën 82-vjeçare duke lënë pas dy djemtë Olsi dhe Edi Rama.
Lajmin për ndarjen e saj nga jeta e dha vetë kreu i qeverisë, ndërsa së bashku kërkuan nga të afëm dhe familjarë të mirëkuptonin zhvillimin e një ceremonie mortore private për shkak të pandemisë së koronavirusit.
Ndarja nga jeta e Aneta Ramës shkriu dje edhe akujt e politikës, duke qenë se shumë figura kundërshtare të kryesocialistit i shprehën ngushëllime për humbjen e njeriut të shtrenjtë, përfshirë këtu edhe presidentin Ilir Meta.
