Gjumi i thellë na çon në dimensione herë të bukura, herë të frikshme. Ëndërrojmë gjëra nga më të çuditshmet, shohim skena që as regjisori më i mirë i filmave thriller s’do i kishte realizuar në atë formë… A e keni pyetur veten ndonjëherë: Pse ëndërrojmë?
Një neurokirurg i quajtur Rahul Jandial e ka studiuar këtë gjë për vite me radhë dhe tanimë ka publikuar edhe një libër që quhet “Ja pse ëndërroni”. “Ndërgjegjia jonë fuqizohet nga energjia, përfshirë dhe ëndrrat dhe rezulton që pjesa e trurit përgjegjëse për ëndrrat është po aq aktive sa ajo kur ne jemi zgjuar”, ka deklaruar ai.
Një përqindje e vogël e njerëzve në botë thonë se “i harrojnë ëndrrat sapo hapin sytë”, ndërsa pjesa dërrmuese memorizojnë ëndrra që shohin thuajse çdo natë, disa herë në javë apo pak më rrallë.
Lexo edhe:
Ne do u paraqesim 4 teori ekzistuese, bazuar në studimet e kryera nga specialistë të fushës.
“Përgjigje ndaj kërcënimeve”
Një teori që shpjegon ëndrrat lidhet me “praktikën e njohjes së gjërave që ne u frikësohemi”. Përshembull, kur ëndërroni që dikush po ju ndjek nga pas, me shumë gjasë ajo ‘skenë’ përfaqëson një situatë reale me të cilën po përballesh. Isabelle Arnulf (Pedagoge e Neurologjisë) thotë se ka pyetur studentët e saj se çfarë kanë ëndërruar një natë para provimit. Rezultoi se ata që kishin ëndërruar për provimin, morën notë më të mirë. Si shpjegohet kjo? Ne mbimendojmë diçka dhe ajo na shfaqet në ëndërr, atje ku ne i përgjigjemi dhe madje shpesh shohim pasojat e një veprimi.
Terapia
Besohet se ëndrrat kanë vlera terapeutike, që na ndihmon të reduktojmë emocionet e ankthit. Në ëndërr mund të na ndodhë të shohim një gjë të përjetuar tashmë, gërshetuar me diçka krejtësisht të panjohur, që ne e interpretojmë si të ardhmen! Kjo na ndihmon të zgjohemi më pozitivë.
Funksioni i trurit
Mbase kjo është teoria më absolute, që lidhet direkt me trurin tonë. Thuhet se ëndrrat shërbejnë për të mbajtur trurin aktiv edhe gjatë gjumit. Pra, e ndihmojnë trurin të jetë në “formë”, rrjedhimisht kur zgjohemi jemi më të kthjellët dhe nuk na duhet shumë kohë për të procesuar gjërat.
Kreativiteti
Një hipotezë interesante na çon “te mendimi kreativ”, që krijon një gamë vizionesh të rrugëtimit jetësor. Adrenalina është prezente edhe kur ëndërrojmë, por në nivel shumë më të ulët. Ëndrrat na ndihmojnë t’a shohim botën me të gjitha komplekset e saj e tek të cilat nuk “u bëjmë dot bisht” as ndjesive më të tmerrshme!
