Regjisori Altin Basha, i cili aktualisht është drejtor i Teatrit Eksperimental , ka shpjeguar për herë të parë arsyet e largimit nga formati televiziv ‘Portokalli’, pjesë e së cilit ishte prej plot 17 vitesh.
Ai tha se një nga arsyet kryesore ishte cenimi i lirisë, të cilin nuk e gëzonte më dhe pse ishte në krye të spektaklit të humorit. Në një intervistë për ‘Abc News’ tha se eksperienca e tij afatgjatë do të shërbejë dhe në postet e tjera të punës.
Pse u larguat nga Portokallia?
Është shumë shpejt për të folur në detaje por ky vendim që e kam marrë pas 17 vitesh do ta jap një përgjigje. Unë nuk kam ndërmend të ushqej thashethemet. E kam parë si një hapësirë lirie. Në momentin kur kjo liri cenohet, arsyeja pse drejtoja Portokallinë ra. Është një kontribut që mendoj se me kohën do të vlerësohet më shumë. Nuk mendoj fare që do të bjerë Portokallia pas ikjes sime. Do duhet të presim për të parë. I uroj suksese atyre që janë atje. Nuk e kam bërë vetëm punën, ka qenë një punë grupi. Kam qenë i privilegjuar që kam punuar me një grup të rinj.
Për të bërë një ‘Portokalli’ në një vend tjetër?
Ndoshta
Nëse nuk do të ishin arsyet do të ishit larguar nga Portokallia?
Jo. Në fund të mandatit ose edhe në mes mund të krijoj një projekt. Ajo që mund të them është se kam krijuar një eksperiencë fantastike atje. Ajo eksperiencë e krijuar pa dyshim që diku do të shprehet.
A do vazhdojnë artistët të jenë të përçarë për Teatrin?
Ajo lloj përçarje nuk ekziston. Mendoj që nuk është problem themelor në komunikim. Ligjet e punës janë të tjera, bindjet politike janë të tjera.
Keni padurim për të parë Teatrin e ri?
Unë e kam parë projektin. Unë mendoj se është dashur të theksohet se po ndërtojnë një Teatër Kombëtar pas 100 vitesh. Kemi pasur një ndërtesë të adoptuar. Do kemi një teatër që do i shërbejë shqiptarëve ndoshta në 200 vitet e ardhshme.
